Bite bya Muhadjiri na Rayon Sports?

Yanditswe na Eric Tony Ukurikiyimfura
Kuya 22 Nyakanga 2020 saa 09:00
Yasuwe :
0 0

Rutahizamu w’Ikipe y’Igihugu ‘Amavubi’, Hakizimana Muhadjiri, biravugwa ko ari umukinnyi mushya wa Rayon Sports nyuma y’uko ayinsiye amasezerano y’umwaka umwe ku wa Kabiri ariko impande zombi zikemeranya kuba zirinze kubitangaza.

Hakizimana Muhadjiri wari umaze igihe gisaga amezi abiri ari mu biganiro na Rayon Sports, amakuru agera kuri IGIHE ni uko yahawe miliyoni 13 Frw yari yumvikanye nayo, ashyira umukono ku masezerano.

Nubwo yari abizi ko nta yindi kipe azakinira mu Rwanda nyuma yo kugaragarizwa na APR FC ko itamwifuza, Muhadjiri yakomeje gutinza ibyo gusinyira Rayon Sports kugira ngo abanze arebe niba hari indi kipe ishobora kumuha ibyo yifuza.

Ubuyobozi bwa Rayon Sports n’uyu mukinnyi bumvikanye ko kuba yasinye bigirwa ibanga.

Hari amakuru avuga ko ibyo byatewe n’uko miliyoni 13 Frw yahawe, ari amafaranga ya Munyakazi Sadate ku giti cye ku buryo ashaka ko abandi bitanze amafaranga yo kugura Hakizimana Muhadjiri babanza kuyatanga.

IGIHE yamenye ko Rayon Sports idateganya gutangaza ko yasinyishije Hakizimana Muhadjiri kugeza igihe ubuyobozi bwayo buzaba bubona ari ngombwa.

Hakizimana Muhadjiri nta kipe yari afite nyuma yo gutandukana na Emirates Football Club yakiniraga muri Leta Zunze Ubumwe z’Abarabu kuva muri Nyakanga 2019.

Uyu mukinnyi w’imyaka 26, yavuye mu Rwanda nyuma y’imyaka itatu akinira APR FC yari yaragezemo muri Nyakanga 2016 avuye muri AS Kigali, nayo yari yamuguze muri Mukura Victory Sports.

Hakizimana Muhadjiri uvukana na kapiteni w’Amavubi, Haruna Niyonzima, yatowe nk’umukinnyi mwiza w’umwaka w’imikino wa 2017/18 mu Rwanda.

Nyuma yo kuzamurwa n’umutoza Mungo Jitiada ‘Vigoureux’, Muhadjiri yakiniye Etincelles, ayivamo yerekeza muri Kiyovu Sports, nyuma ajya gukinira Mukura Victory Sports yamazemo imyaka ibiri mbere yo kugurwa na AS Kigali atakiniye igahita imutanga muri APR FC.

Rayon Sports yaherukaga gusinyisha umunyezamu Kwizera Olivier, Umurundi Nihoreho Arsène, Umunya-Togo Alex Harlley wakinaga mu cyiciro cya kane muri Leta Zunze Ubumwe za Amerika, Niyonkuru Sadjati wakiniraga Marines FC na Uwiringiyimana Christophe wakiniraga Gicumbi FC.

Yaguze kandi Issa Bigirimana wakiniraga Police FC, Niyibizi Emmanuel wakiniraga Etoile de l’Est, Manace Mutatu wakinaga muri Gasogi United n’abandi bakinnyi 10 bakiri bato bazamuwe, ubuyobozi buvuga ko bazatizwa andi makipe.

Mu mwaka utaha w’imikino, Rayon Sports izatozwa na Guy Bukasa na we wavuye muri Gasogi United.

Hakizimana Muhadjiri yasinyiye Rayon Sports umwaka umwe
Muhadjiri nta kipe yari afite nyuma yo gutandukana na Emirates Football Club yo muri Leta Zunze Ubumwe z'Abarabu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .