00:00:00 IGIHE NETWORK KN KINYARWANDA EN ENGLISH FR FRANCAIS

Guhemba abitwaye neza byapfiriye mu iterura cyangwa Rwanda Premier League iracyakambakamba?

Yanditswe na Iradukunda Olivier
Kuya 5 June 2024 saa 11:26
Yasuwe :

Nyuma y’imyaka itandatu, abakinnyi beza mu Rwanda bagiye kongera guhembwa nk’abitwaye neza, igikorwa cyashyizwe imbere na Rwanda Premier League mu rwego rwo kongera imbaraga mu ihangana rya Shampiyona y’u Rwanda.

Si mu ihangana gusa kuko ubuyobozi bwa Rwanda Premier League bwagerageje kujya impande zose mu bagira uruhare kugira ngo umupira w’u Rwanda uzamure urwego.

Si kenshi mu Rwanda haba ibikorwa byo guhemba abahize abandi muri ruhago kuko igikorwa nk’iki cyaherukaga gukorwa na Azam TV yari ifite Shampiyona mu biganza mu 2018. Gusa, kompanyi ya Hyper Sports Group Ltd yahembye abitwaye neza mu 2021/22.

Abitwaye neza muri Shampiyona y’u Rwanda bagiye kongera guhembwa, ariko muri bimwe mu byiciro bizatoranywamo abahize abandi hagaragaramo agatotsi.

Haribazwa niba ku nshuro ya mbere bibaye haba harabayemo gupfira mu iterura, cyane ko Rwanda Premier League ari bwo ikivuka. Gusa birashoboka ko ari kwa kundi umwana akambakamba bityo yakura akazagenda neza ubutaha.

Kuri iyi nshuro, nyuma yo guhemba abitwaye neza buri kwezi guhera muri Ukuboza, Rwanda Premier League yagaruye ibi bihembo by’umwaka aho bigabanyije mu byiciro 17.

Ibyo birimo umukinnyi watsinze ibitego byinshi, umukinnyi mwiza, umutoza, umunyamakuru n’umusifuzi b’umwaka mu bagabo n’abagore.

Hari kandi umukinnyi muto w’umwaka, umunyezamu mwiza, uwatsinze igitego cyiza n’ikipe nziza mu bagabo. Kongeraho ikiganiro cyiza kuri Radio n’icyiza kuri televiziyo ndetse n’ikinyamakuru cyandika cyahize ibindi.

Ibi byiciro bikimara kujya hanze, aho hamenyekanye na bamwe mu bazabihatanamo, bari benshi bagaragaje ko harimo ibinegu nko kuba hatarimo icyiciro cy’umufana mwiza cyangwa itsinda ry’abafana ryitwaye neza.

Ibihembo by’umwaka ntibizareba umusaruro w’umwaka wose!

Nubwo ibi bihembo bizatangwa ku wa 15 Kamena ari iby’umwaka, ariko ntihazarebwa umusaruro wose abakinnyi bagize mu mwaka w’imikino wa 2023/24.

Abashinzwe gutegura iki gikorwa bavuze ko mu gutanga ibihembo, bazahera mu Ukuboza 2023 kuko ari bwo bashobora kubona imibare igaragaza ibyakozwe.

Rwanda Premier League yatanze ibihembo by’ukwezi bya mbere muri Mutarama aho harebwe umusaruro mu kwezi kwari kwabanje.

Bamwe mu bakinnyi beza muri Shampiyona birengagijwe

Kimwe mu byatunguranye ni ukubona Ruboneka Jean Bosco wa APR FC ndetse na Muhire Kevin wa Rayon Sports bari mu bahataniye igihembo cy’umukinnyi w’umwaka mu gihe ntaho bigeze bagaragara mu bahawe ibihembo by’ukwezi.

Muhire Kevin yatsinze ibitego bitandatu, atanga imipira 11 yavuyemo ibitego kuri bagenzi be mu gihe Ruboneka yatsinze ibitego bine, atanga imipira icyenda yavuyemo ibitego.

Ku rundi ruhande, Ani Elijah watsinze ibitego 15 anganya na Victor Mboama wakinnye imikino mike, na we ari mu bahataniye igihembo cy’umwaka mu gihe atari uko bimeze kuri rutahizamu wa APR FC.

Mu bandi bakinnyi birengagijwe muri iki cyiciro harimo nka Hakizimana Muhadjiri (Police FC) watsinze ibitego icyenda akanatanga imipira itandatu yavuyemo ibindi kuri bagenzi be, Rukundo AbdulRahman wa Amagaju FC, we watsinze ibitego 12 akanatanga imipira 10 ndetse na Solomon Adeyinka wa Musanze FC, watsinze ibitego umunani, agatanga imipira itatu.

Umunyezamu wa APR FC, Pavelh Ndzila wamaze imikino 16 atinjizwa igitego muri 29 yakinnye na we ni umwe mu bakabaye bajya muri iki cyiciro nubwo yashyizwe mu bazavamo umunyezamu mwiza.

Ku gihembo cy’umunyezamu mwiza, nta wakwibagirwa Umunyezamu Muhawenayo Gad wakinnye imikino 23 muri uyu mwaka w’imikino wa 2023/24 ndetse agafasha Musanze FC kuba iya gatatu muri Shampiyona, umwanya mwiza igize mu mateka yayo.

Muhawenayo yahanganiraga umwanya n’abandi banyezamu bakomeye barimo Umunya-Gambia Modou Jobe wahamagawe mu bakinnye Igikombe cya Afurika cya 2021 na 2023, ndetse na Ntaribi Steven. Kubahigika na we byamuhesheje guhamagarwa mu Ikipe y’Igihugu ‘Amavubi’ inshuro ebyiri ziheruka.

Icyiciro cy’abanyamakuru cyavugishije benshi

Iki cyiciro kiri mu byavugishije benshi dore ko bitandukanye n’ibindi byatoranyijwemo batatu gusa, abanyamakuru b’abagabo bahataniye igihembo cy’umwaka ni umunani.

Abo barimo Rugangura Axel, Ndayishimiye Reagan ‘Rugaju’ na Kayishema Thierry ‘Tity’ ba RBA, Samuel Karenzi na Niyibizi Aime ba Fine FM, Kayiranga Ephrem wa Ishusho TV, Imfurayacu Jean Luc (B&B FM) na Hitimana Jean Claude wa Radio/TV10.

Abahataniye igihembo cy’umwaka mu bagore ni Rigoga Ruth (RBA), Ishimwe Adélaïde (TV10) na Uwimana Clarisse (B&B FM).

Nta munyamakuru wandika, ufata amashusho cyangwa amafoto washyizwe mu bahataniye ibihembo by’umwaka ariko IGIHE, Inyarwanda, Isimbi, The NewTimes na RwandaMagazine bizahanganira igihembo cy’ikinyamakuru cyandika cy’umwaka.

Hakizimana Muhadjili yirengagijwe mu bihembo by'umwaka
Nubwo ari mu banyezamu bazatoranywamo umwiza, yamaze imikino myinshi atinjizwa igitego byatuma ajya mu bakinnyi beza
Rukundo AbdulRahman wa Amagaju FC yari akwiriye kuba mu bakinnyi beza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .