Gorilla FC iri mu makipe yiyubatse, yapimishije abakinnyi bayo COVID-19

Yanditswe na Eric Tony Ukurikiyimfura
Kuya 20 Ukwakira 2020 saa 08:35
Yasuwe :
0 0

Gorilla FC iri mu makipe ahabwa amahirwe menshi yo kuzamuka mu Cyiciro cya Mbere mu mwaka utaha w’imikino, yapimishije abakinnyi bayo icyorezo cya COVID-19 mbere yo gutangira imyitozo.

Gorilla FC ni imwe mu makipe umunani azakina imikino ya kamarampaka yo gushaka itike yo kuzamuka mu Cyiciro cya Mbere, mu kwezi gutaha.

Kuri uyu wa Kabiri nibwo abakinnyi n’abandi bakozi bayo bose hamwe 32, bapimwe icyorezo cya COVID-19 mu gikorwa cyabereye ku Kicukiro.

Iyi kipe iri mu yiyubatse muri uyu mwaka, aho ifite abakinnyi barimo Tuyisenge Pekeake ‘Pekinho’, Lomami André, Ntaribi Steven n’abandi batandukanye, izatangira umwiherero ku wa Gatanu.

Umutoza wayo, Ruremesha Emmanuel, avuga ko nyuma y’uko imikino isubukuwe mu mpera z’ukwezi gushize, bakomeje gukurikirana abakinnyi, ariko bizeye kubazamurira urwego nibongera guhurira hamwe.

Ati “Abakinnyi bakoraga imyitozo itandukanye twabaga twabahaye ku giti cyabo. Muri iki cyumweru tugiye kureba ko dushyiramo ingufu bagere ku rwego rukenewe mu kibuga, ibindi byumweru bibiri tuzibande ku bijyanye na tekinike n’amayeri yo gukina.”

Gorilla FC yabaye iya kabiri mu itsinda A, inyuma ya Rutsiro FC, izahura na Rwamagana City FC yabaye iya gatatu mu itsinda B.

Imikino isoza Shampiyona y’Icyiciro cya Kabiri izakinwa hagati ya tariki ya 13 n’iya 21 Ugushyingo 2020.

Andi makipe azakina iyi mikino ni Amagaju FC, Rwamagana FC, Alpha FC, Vision, Interforce Fc na Étoile de l’Est.

Abakinnyi ba Gorilla FC bapimwe COVID-19 kuri uyu wa Kabiri
Sindambiwe Protais (iburyo) ni umwe mu bakinnyi bapimwe COVID-19
Umunyezamu Ntaribi Steven wakiniye APR FC na Police FC, ari mu bo Gorilla FC izakoresha mu mikino ya kamarampaka
Abakozi 32 ba Gorilla ni bo bapimwe COVID-19
Gorilla FC izatangira umwiherero ku wa Gatanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .