00:00:00 IGIHE NETWORK KN KINYARWANDA EN ENGLISH FR FRANCAIS

Gerard Piqué yasezeye ruhago ku myaka 35

Yanditswe na Iradukunda Olivier
Kuya 4 Ugushyingo 2022 saa 06:23
Yasuwe :

Myugariro wa FC Barcelona n’Ikipe y’Igihugu ya Espagne Gerard Piqué Bernabeu yatangaje ko azahagarika umupira w’amaguru nyuma y’umukino wa Shampiyona ‘La Liga’ uzahuza ikipe ye na Almeria.

Inkuru yo guhagarika gukina ruhago, Piqué yayitangaje abinyujije ku mbuga nkoranyambaga ze.

Piqué yatangaje ko nta yindi kipe azigera akinira itari FC Barcelona ndetse yashimangiye ko ku Kibuga cyayo Spotify Camp Nou ariho azasezerera bwa nyuma umupira w’amaguru nk’umukinnyi wabigize umwuga. Ni urugendo azashyiraho iherezo ku wa Gatandatu, tariki ya 5 Ugushyingo 2022.

Uyu mukinnyi ufite imyaka 35, yatwaye igikombe cya Shampiyona ya Espagne “La Liga” inshuro umunani, atwarana na FC Barcelona UEFA Champions League inshuro eshatu.

Gerard Piqué mu mashusho yasohoye yavuze ko byose yabigezeho mu gihe amaranye n’abakunzi ba FC Barcelona.

Yagize ati “Umupira w’amaguru wampaye byose mfite. Barcelona na yo yampaye buri kimwe, bamwe bafana bacu icyo nakeneye cyose mwarakimpaye.’’

“Ni yo mpamvu inzozi zanjye nagize nkiri muto zose zabaye impamo. None nifuje kubabwira ko noneho bya bindi byose nagombaga gukora ngiye kubishyiraho akadomo.’’

Usibye FC Barcelona, Piqué yanakiniye Ikipe y’Igihugu ya Espagne, yayikiniye imikino 102 ndetse yatwaranye na yo Igikombe cy’Isi cya 2010. Yanegukanye Euro ebyiri. Yasezeye kuyikinira nyuma y’Igikombe cy’Isi cya 2018 cyabereye mu Burusiya.

Piqué yasezeye mu gihe yari amaze iminsi atari kwifashishwa muri FC Barcelona kuko kuva uyu mwaka watangira amaze kubanza mu kibuga inshuro eshanu gusa ku ngoma y’Umutoza Xavi Hernandez.

Mu myaka 14 amaze muri FC Barcelona yabanzaga mu kibuga ariko uyu mwaka yabuze umwanya ahanini kubera abakinnyi bashya iyi kipe yaguze barimo Andreas Christensen na Jules Kounde.

Ubutumwa bwe, Piqué yabusoje aca amarenga ko ashobora kugaruka muri iyi kipe ariko akaza akora indi mirimo itandukanye no kuyikinira.

Ati "Kuri uyu wa Gatandatu ndafata ibihe namaranaga na Barcelona, byose mbimarane n’abana banjye. Nzakomeza gushyigikira ikipe, nzaba umukunzi n’umufana wayo, kandi muranzi neza bidatinze tuzabonana."

Tariki 27 Gicurasi 2008 ni bwo FC Barcelona yasinyishije Gerard Piqué nk’umukinnyi wayo avuye muri Manchester United yo mu Bwongereza.

Yatangiriye ruhago mu ishuri ry’abato ba FC Barcelona mu 1997 mbere yo kuyivamo mu 2004, yerekeza muri Man United yamazemo imyaka ine mbere yo gusubira ku ivuko.

Muri uyu mwaka wa 2022/2023, Piqué ntiyahiriwe haba mu kibuga ndetse no mu muryango kuko yatandukanye n’umugore we Shakira Isabel Mebarak Ripoll bari bamaranye hafi 12.

Muri FC Barcelona, Gerard Piqué yakinnye imikino 615, atsinda ibitego 52; yatwaranye na yo La Liga umunani, Champions League eshatu, Spanish Super Cup esheshatu, Copa del Rey zirindwi UEFA Super Cup eshatu na FIFA Club World Cup imwe.

Gerard Piqué yatwaye UEFA Champions League inshuro eshatu ari kumwe na FC Barcelona
Gerard Piqué yatwaye Igikombe cya Super Cup inshuro zose yagikiniye
Gerard Piqué w'imyaka 35 yatwaye Igikombe cy'Isi cya 2010 ari kumwe na Espagne
Gerard Piqué yari icyitegererezo kuri bagenzi be bakinana muri FC Barcelona
Gerard Piqué yasezeye muri FC Barcelona yari amazemo imyaka 14
Gerard Piqué yasezeye abafana ariko avuga ko azakomeza kuba inyuma ya FC Barcelona

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .