Gabriel na Willian bafashije Arsenal gutsinda umukino ufungura Premier League nyuma y’imyaka 11 (Amafoto)

Yanditswe na Eric Tony Ukurikiyimfura
Kuya 12 Nzeri 2020 saa 09:04
Yasuwe :
0 0

Abanya-Brésil; Gabriel Magalhães na Willian Borges da Silva, bakinnye umukino wabo wa mbere muri Arsenal, banayifasha kwitwara neza itsinda Fulham ibitego 3-0 ku munsi wa mbere wa Premier League.

Uyu mukino wabimburiye iyindi ya Premier League mu mwaka w’imikino wa 2020/21, wabereye ku kibuga Craven Cottage cya Fulham kuri uyu wa Gatandatu.

Willian wavuye muri Chelsea, yagize uruhare mu bitego bitatu byose Arsenal yatsinze, mu gihe myugariro Gabriel yatsinze igitego cya kabiri ku mukino wa mbere yakinnye mu Bwongereza, nyuma yo kugurwa muri Lille yo mu Bufaransa.

Arsenal yagaragaje urwego ruri hejuru mu gihe Fulham yaranzwe no guhuzagurika mu bwugarizi bwayo.

Alexandre Lacazette yafunguye amazamu ku gitego cyabonetse ku munota wa munani ubwo ba myugariro ba Fulham barimo Tim Ream, bananirwaga gukiza izamu nubwo umunyezamu Marek Rodak yari akuyemo umupira watewe na Willian.

Nyuma y’iminota ine amakipe yombi avuye kuruhuka, myugariro wo hagati; Gabriel Magalhães, yatsindiye Arsenal igitego cya kabiri n’umutwe ku mupira wari uvuye muri koruneri yatewe na Willian.

Uyu Willian wanateye umupira w’umuterekano wasubijwe inyuma n’igiti cy’izamu, ni we watanze umupira wavuyemo igitego cya gatatu cyatsinzwe na kapiteni Pierre-Emerick Aubameyang ku munota wa 57.

Umutoza wa Arsenal, Mikel Arteta, yatangaje ko yashimishijwe n’uburyo abakinnyi bashya Gabriel na Willian bitwaye muri uyu mukino.

Ati “[Gabriel] ntabwo yakinnye umukino uwo ari wo wose mu mezi atandatu ashize, kuza agakina muri Premier League amaze kwitozanya n’ikipe iminsi itatu cyangwa ine, ni ikintu gikomeye.”

“Willian amenyereye iyi Shampiyona, arayizi kandi biramworohera kuko n’ubundi yabaga hano i Londres.”

Fulham yabonye uburyo buke muri uyu mukino, burimo ubwo Aleksandar Mitrović yabonye habura iminota 27 ngo umukino urangire, umupira ukurwamo na Bernd Leno.

Arsenal yaherukaga gutsinda umukino w’umunsi wa mbere wa Premier League mu mwaka w’imikino wa 2009/10.

Mu yindi mikino yabaye kuri uyu wa Gatandatu, Liverpool yatwaye igikombe cya Shampiyona giheruka, yatsinze Leeds United yavuye mu cyiciro cya kabiri ibitego 4-3 mu gihe Crystal Palace yatsinze Southampton igitego 1-0.

Umukino wabereye mu muhezo kubera icyorezo cya Coronavirus
Alexandre Lacazette afungura amazamu mu minota ya mbere
Lacazette ashimirwa na bagenzi be barimo Willian na Maitland-Niles
Gabriel Magalhães mu kirere, atsindira Arsenal n'umutwe
Gabriel Magalhães yishimira igitego cya mbere yatsindiye Arsenal mu mukino we wa mbere
Kapiteni wa Arsenal, Pierre-Emerick Aubameyang, ashaka uko atambuka kuri ba myugariro ba Fulham
Abatoza ku mpande zombi: Scott Parker wa Fulham na Mikel Arteta wa Arsenal, bareba uko abakinnyi babo bitwara
Abakinnyi ba Arsenal bishimira igitego cya gatatu cyatsinzwe na Aubameyang
Arsenal yaherukaga gutsinda umukino w'umunsi wa mbere wa Premier League mu 2009

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .