Mu gihe habura iminsi mike ngo igikombe cy’u Burayi (Euro) kizabera mu Bufaransa kigatangira, FIFA yatangaje impinduka mu mategeko 95 agenga amarushanwa yayo, akazatangira kubahirizwa muri icyo gikombe.
Abagize akanama k’ubutegetsi mpuzamahanga ka FIFA bagera ku munani bahinduye amagambo ibihumbi 10 yari asanzwe mu mategeko yakoreshwaga kugeza ubu.
Amwe mu mategeko yahinduwe n’ako kanama harimo irigenga gutera penaliti. Rivuga ko uwariwe ushatse kuryarya umuzamu kugirango ajye mu rundi ruhande mbere y’uko atera umupira, azajya ahabwa ikarita y’umuhondo, umupira yari agiye gutera ugahabwa abakinnyi b’ikipe bahanganye.
Mu mategeko mashya hashyizwemo n’ingingo ziteganya ibihano bitatu ku muntu wakiniye nabi mugenzi we cyangwa agakora umupira n’ukuboko ari mu rubuga rw’amahina. Uwo azajya ahanishwa ikarita itukura, hatangwe penaliti ndetse n’uwakoze ikosa ahagarikwe gukina mu gihe runaka.
Ateganya ko abasifuzi bazaba bafite ububasha burenze bwo gutanga ikarita itukura ku muntu wakoze ikosa abigambiriye, naho mu gihe yarikoze ageragezaga kurwanira umupira, ikarita y’umuhondo ibe ihagije.
Irindi tegeko rigendanye no gusohora umukinnyi mu kibuga. Ikarita y’umutuku izajya itangwa mu makimbirane abaye mukino na mbere yayo, mu gihe umukinnyi agaragaje ko adashaka gukurikiza indangagaciro z’umukino.
Kuvurira umukinnyi mu kibuga
Ku bijyanye no kuvurira abakinnyi mu kibuga, niba abaganga bamaze kumuvura mu masegonda 20, uwo mukinnyi ntategetswe gusohoka kubanza kuva mu kibuga ahubwo ashobora guhita akomeza gukina. Ubusanzwe umukinnyi yategekwaga kubanza gusohoka hatarebwe igihe yavuwe uko kingana.
Ku byerekeranye no kurengura umupira hakoreshejwe amaboko, byari biteganyijwe ko unagwa werekezwa imbere yawo, amategeko mashya avuga ko uzajya werekezwa ahari ho hose, yaba iburyo, ibumoso, inyuma, imbere.
Igihe cyo kunywa amazi ku bakinnyi
Amategeko mashya kandi yemera ko bitewe n’aho abakinnyi bakinira n’ibihe bihari, bazajya bagenerwa igihe cyo kunywa amazi nkuko byagaragaye mu mikino ya nyuma y’igikombe cy’Isi cyabereye muri Brazil, imikino igahagarara kubera ubushyuhe bwinshi, abakinnyi bakanywa amazi.
TANGA IGITEKEREZO