FERWAFA igiye gushaka Umuyobozi wa tekinike mushya usimbura Habimana Hussein

Yanditswe na Kabera Haruna
Kuya 7 Kanama 2020 saa 01:19
Yasuwe :
0 0

Ishyirahamwe ry’Umupira w’Amaguru mu Rwanda (FERWAFA) rigiye gushaka undi muyobozi wa tekiniki mushya nyuma yaho Habimana Hussein ashoje amasezerano y’imyaka ibiri.

Ku wa 6 Nyakanga 2018 nibwo FERWAFA yatangaje ko Habimana Hussein yagizwe Umuyobozi mushya wa Tekinike mu gihe cy’imyaka ibiri, asimbuye umuholandi Hendrik Pieter weguye mu 2016.

Mu kiganiro yagiranye na IGIHE, Umunyamabanga Mukuru wa FERWAFA, Uwayezu François Régis, yavuze ko amasezerano ya Habimana Hussein yarangiye kandi nta gahunda ihari yo kumwongerera andi.

Yakomeje avuga ko kuri ubu FERWAFA iri gushaka uwamusimbura kuri uwo umwanya, akaba azatangazwa mu minsi ya vuba.

Ati “Uwahoze ari umuyobozi wa tekinike muri FERWAFA amasezerano ye yarangiye mu kwezi kwa Nyakanga kandi ntabwo azongererwa andi ahubwo bidatinze mu minsi ya vuba, turatangaza uburyo bwo gutora undi ndetse naboneka na we azahita atangazwa.”

Bivugwa ko mu myaka ibiri Habimana Hussein yamaze kuri uyu mwanya, umusaruro we utigeze wishimirwa ndetse n’imyitwarire ye hanze y’akazi ikaba itaranyuze abakoresha be.

Habimana Hussein ni Umunyarwanda ufite impamyabushobozi ya Kaminuza mu buyobozi yakuye muri Kaminuza yigenga y’i Bruxelles mu Bubiligi. Yakiniye ikipe y’abato ya APR FC hagati y’i 1997 na 2002.

Yakiniye kandi Kiyovu Sports umwaka umwe mu mwaka w’imikino wa 2003/04, ajya i Burayi mu Bibiligi aho yaciye mu makipe y’abato ya Anderlecht kugeza muri 2008 ubwo yajyaga mu ikipe ya K Boom no muri RFC kugeza mu 2013.

Yatoje ikipe ya Canada y’abagore mu batarengeje imyaka 17, anatoza amakipe y’abagore y’abakiri bato muri icyo gihugu. Ni akazi yamazemo imyaka irenga itanu.

Habimana Hussein yari yahawe amasezerano y'imyaka ibiri nk'Umuyobozi wa Tekinike muri FERWAFA
Umunyamabanga Mukuru wa FERWAFA, Uwayezu François Régis (iburyo) yavuze ko batazongerera amasezerano Habimana Hussein (ibumoso)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .