Uyu mukino w’Umunsi wa 35 wa La Liga wabaye ku Cyumweru, tariki ya 10 Gicurasi, guhera Saa Tatu z’umugoroba, kuri Camp Nou aho wari wakiriwe na FC Barcelone.

FC Barcelone yasabwaga kunganya cyangwa gutsinda uyu mukino ubundi ikegukana igikombe cya 29 cya shampiyona.

Iyi kipe yari imbere y’abafana bayo yinjiye mu mukino mbere ya Real Madrid, ku munota wa cyenda gusa ibona umupira uteretse inyuma y’urubuga rw’amahina, aho watewe na Marcus Rashford uruhukira mu izamu.

Iki gitego uyu Mwongereza yatsinze cyabaye icya mbere FC Barcelone itsinze kuri ‘coup-franc’ muri El-Clásico kuva bikozwe na Lionel Messi mu 2012.

Bidatinze kandi, ku munota wa 18, FC Barcelone yabonye igitego cya kabiri gitsinzwe na Ferran Torres ku mupira mwiza yari ahawe na Dani Olmo.

Nyuma y’uko Real Madrid itsinzwe ibi bitego byo mu minota ya mbere yagiye ibona uburyo nkaho Gonzalo García yari asigaranye n’izamu ariko ateye umupira unyura ku ruhande.

Igice cya kabiri cyaranzwe no gushyamirana ku mpande zombi aho cyabonetsemo amakarita atanu y’umuhondo arimo atatu ku ruhande rwa Real Madrid n’abiri ku ruhande rwa FC Barcelone.

Ku munota wa 64, Vinícius Júnior yashoboraga kubonera igitego Real Madrid, ariko umunyezamu wa FC Barcelone aratabara mu gihe kandi iyi kipe yari yasuye yakomeje guhusha uburyo butandukanye.

Umukino warangiye FC Barcelone itsinze Real Madrid ibitego 2-0, ihita yegukana Igikombe cya Shampiyona cya 2025/2026.

Mu gihe habura imikino itatu, Barça yatwaye iki gikombe ifite amanota 91 naho Real Madrid ya kabiri ikaba ifite amanota 77.

Raphina wa FC Barcelone atwara umupira Camavinga wa Real Madrid mu mukino wabaye kuri iki Cyumweru

Marcus Rashford yatsinze igitego cya mbere kuri coup-franc

Rashford yabaye umukinnyi wa mbere wa FC Barcelone utsinze coup-franc muri El Clasico kuva bikozwe na Lionel Messi mu 2012

Umunyezamu wa Real Madrid, Thibaut Courtois, areba umupira watewe na Ferran Torres ujya mu izamu

Ferran Torres na Dani Olmo bishimira igitego cya kabiri cya FC Barcelone

Abakinnyi ba FC Barcelone bateruye umutoza wabo Hansi Flick wari wapfushije Se mu gitondo

FC Barcelone yegukanye Shampiyona ya Espagne ku nshuro ya 29 ndetse ni ubwa mbere igikombe cya La Liga gitwariwe kuri El Clasico