Imikino yakinwe ni iy’Umunsi wa Karindwi wa UEFA Champions League, aho FC Barcelone yari yaratsinzwe umukino umwe gusa. Ku munota wa mbere iri ku kibuga cya Estádio da Luz, yari yamaze kwinjizwa igitego cya mbere cyatsinzwe na Vangelis Pavlidis.

Uyu mukinnyi wari mwiza muri uyu mugoroba, ni we winjije igitego cya kabiri ndetse n’icya gatatu ku munota wa 22 na 30. Ni mu gihe iyi kipe yo muri Espagne yari yishyuriwe igitego kimwe kuri penaliti yinjijwe na Robert Lewandowski ku munota wa 13.

Benfica yongeye kuyobora umukino n’ikinyuranyo cy’ibitego ubwo Ronald Araújo yitsinda icya kane ku munota wa 64, ariko FC Barcelone yavuye inyuma itsinda ibitego bitatu birimo indi penaliti ya Robert Lewandowski, mu gihe Raphinha na Eric García bashyizemo ibyo kunganya, Raphinha yongera gushyiramo icy’agashinguracumu ku munota wa gatandatu w’inyongera.

Indi kipe ikomeye yakinnye muri uyu mugoroba ni Liverpool yo mu Bwongereza, yari yakiriye LOSC Lille yo mu Bufaransa.

Liverpool yabonye igitego mu gice cya mbere, cyatsinzwe na Mohamed Salah wujuje ibitego 50 mu marushanwa y’i Burayi, cyishyurwa na Jonathan David ku munota wa 62, nyuma y’uko iyi kipe yo mu Bufaransa yari ihawe ikarita itukura.

Harvey Elliott yashyizemo igitego cya kabiri, gifasha Liverpool gukomeza kuyobora urutonde rwa UEFA Champions League n’amanota 21 nyuma y’imikino irindwi imaze gukina, ikaba ari na yo kipe rukumbi itaratsindwa umukino.

Bologna yashakaga amanota atuma yicuma ku rutonde rusange, yihagazeho itsinda Borussia Dortmund ibitego 2-1, igira amanota atandatu, aho isabwa gutsinda umukino wa nyuma ikareba ko yazamuka.

Atalanta yo mu Butaliyani na yo ntabwo yoroheye SK Sturm Graz yo muri Autriche, kuko yayitsinze ibitego 5-0. Ademola Lookman yatsinze bibiri, Mateo Retegui, Mario Pašalić na Charles De Ketelaere batsinda ibindi.

Amakipe umunani ayoboye andi kugeza ubu ni Liverpool, FC Barcelone, Atletico Madrid, Atalanta, Arsenal, Bayer Leverkusen, Inter Milan na Aston Villa.

Uko imikino yo ku wa Kabiri yagenze

• Atalanta 5-0 Sturm
• AS Monaco 1-0 Aston Villa
• Atletico Madrid 2-1 Bayer Leverkusen
• Benfica 4-5 FC Barcelone
• Bologna 2-1 Borussia Dortmund
• Club Brugge 0-0 Juventus
• Crevna Zvezda 2-3 PSV Eindhoven
• Liverpool 2-1 Lille
• ŠK Slovan Bratislava 1-3 Stuttgart

FC Barcelone yavuye inyuma itsinda Benfica ibitego 5-4

Benfica yananiwe kwihagararaho ngo ikure amanota kuri FC Barcelone

Liverpool ikomeje kuyobora urutonde rwa UEFA Champions League

Mohamed Salah yujuje ibitego 50 mu mikino y'i Burayi

Atletico Madrid yatsinze Bayer Leverkusen ibitego 2-1

Juventus yanganyije na Club Brugge 0-0

Monaco yatsinze Aston Villa igitego 1-0

PSV yatsinze Crevna Zvezda ibitego 3-2