00:00:00 IGIHE NETWORK KN KINYARWANDA EN ENGLISH FR FRANCAIS

Elizabeth II yunamiwe: Ibyaranze Shampiyona y’u Bwongereza yasubukuwe

Yanditswe na Iradukunda Olivier
Kuya 18 September 2022 saa 11:25
Yasuwe :

Mu mpera z’iki cyumweru imikino ya Shampiyona y’Umupira w’amaguru mu Bwongereza yasubukuwe, ariko abakinnyi bakina bambaye agatambaro k’umukara ku kuboko kw’iburyo, mu rwego rwo kunamira Umwamikazi Elizabeth II uherutse kwitaba Imana.

Uretse kwambara utu dutambaro, mbere y’uko imikino itangira buri kipe yazanaga indabo, amakipe yombi akazitereka hagati mu kibuga, hanyuma hagafatwa umunota wo kwibuka bigakurikirwa no kuririmba idirimbo yubahiriza igihugu nshya ‘God Save The King’.

Umupira w’amaguru mu Bwongereza wahagaritswe mu mpera z’icyumweru gishize nyuma y’uko Umwamikazi Elizabeth II wari umaze ige kinini ku ngoma mu Bwongereza, atanze afite imyaka 96.

Kuri Molineux Stadium, aho Wolverhampton Wanderers yakiriye Manchester City, abahoze ari abakinnyi nka Steve Bull na Mike Summerbee nibo bazanye indabo mu kibuga rwagati.

Umuyobozi w’icyubahiro wa Bournemouth, Jeff Mostyn n’umwe muri ba nyiri Newcastle, Amanda Staveley nabo bazanye indabo zo kwibuka Umwamikazi ku kibuga St James Park.

Uwahoze ari umukinnyi wa Tottenham, Ledley King na Emile Heskey wahoze ari rutahizamu wa Leicester City, nabo bashyize indabo mu ruziga rwagati mbere y’umukino wahuje amakipe kuri Stade ya White Hart Lane.

Mu Bwongereza hamaze kuba imikino itanu, aho bagarukiye mu kibuga ku munsi wayo wa munani kuko umunsi wa karindwi wasubitswe.

Iyi mikino yarangiye ikipe ya Aston Villa itsinze Souhampton 1-0, Nottingham Forest itsindwa 2-3 na Fulham, iyi mikino yombi yabaye kuwa Gatanu tariki ya 16 Nzeri 2022.

Kuwa Gatandatu imikino yarakomeje, Manchester City isanga Wolverhampton Wanderers iwayo iyitsinda ibitego 3-0, Erling Haaland yongera kwerekana ko nta guhagarara afite ayifasha kubona intsinzi.

Kuri uwo munsi kandi Newscastle United yanganyije na AFC Bournemouth igitego 1-1, naho Tottenham Hotspur isya itanzitse itsinda Leicester City ibitego 6-2.

Iyi shampiyona irakomeza kuri iki Cyumweru tariki ya 18 Nzeri, Arsenal yakirwa na Brentford, Everton yakire West Ham United.

Imikino itazaba kuri uyu munsi ni umukino wari kuzahuza Brighton na Crystal Palace, Manchester United na Leeds, ndetse n’ukomeye kurusha indi yose wa Chelsea na Liverpool yasubitswe kubera imyigaragambyo ishobora kuba mu Bwongereza.

Mbere ya buri mukino Umwamikazi Elizabeth II yabanje kunamirwa
Umuyobozi w'icyubahiro wa Bournemouth, Jeff Mostyn na Amanda Staveley umwe muri ba Nyiri Newcastle ni bo batwaye indabo zo kwibuka Umwamikazi Elizabeth II
Uwahoze ari umukinnyi wa Tottenham, Ledley King (iburyo) na Emile Heskey (ibumoso) wahoze ari rutahizamu wa Leicester City nibo bazanye indabo mu kibuga
Abakinnyi bafashe umwanya wo kunamira Umwamikazi Elizabeth II mbere y'uko imikino itangira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .