Kuri uyu wa Kabiri, tariki ya 26 Gicurasi 2026, ni bwo iyi kipe yo mu Cyiciro cya Mbere mu Bubiligi yatangaje ko yasinyishije abakinnyi bashya mu ikipe yayo y’abato.

Mu bakinyi bahawe amasezerano harimo Darryl Nkulikiyimana usanzwe ari umukinnyi w’Ikipe y’Igihugu y’u Rwanda ‘Amavubi’, ari na bwo bwa mbere yari asinyiye ikipe nk’uwabigize umwuga.

Mu butumwa ikipe ye yanyujije ku mbuga nkoranyambaga yavuze ko kumuha amasezerano ari ukumushimira urwego yagaragaje mu mwaka w’imikino wa 2025/26.

Iti “Darryl Nkulikiyimana yasinye nk’uwabigize umwuga. Uyu mukinnyi w’imyaka 21 ukina mu bwugarizi yabonye igihembo cy’akazi gakomeye yakoze muri uyu mwaka w’imikino mu ikipe y’abatarengeje imyaka 23, ahabwa amasezerano y’umwaka utaha w’imikino ushobora kongerwa.”

Nkulikiyimana we yagize ati “Uyu munsi nashyize umukono ku masezerano nishimye kandi nezerewe. Ni nyuma yo kwitanga, gukora akazi mu bihe bigoye. Ni intangiriro nshya. Imana ishimwe.”

Uyu mukinnyi aheruka guhamagarwa mu Ikipe y’Igihugu mu Ukwakira 2025, ubwo Amavubi yakinaga na Bénin ndetse na Afurika y’Epfo mu mikino isoza amajonjora yo gushaka itike yo kujya mu Gikombe cy’Isi cya 2026.

Umupira yawutangiriye mu irerero ry’umupira w’amaguru rya FCV Dender EH, yarivuyemo ajya muri Standard de Liège y’abatarengeje imyaka 16, mbere yo kuyikinira no mu bindi byiciro by’abato.

Undi wahawe amasezerano ni Kelyan Kielo-Lezi w’imyaka 18 ukomoka muri Repubulika Iharanira Demokarsi ya Congo, we akaba akina nka rutahizamu.

Nkulikiyimana yakuriye mu makipe y'abato ya Standard de Liège

Darryl Nkulikiyimana akina mu bwugarizi

Nkulikiyimana yasinye amasezerano ye ya mbere nk'uwabigize umwuga

Darryl Nkulikiyimana ni myugariro w'Amavubi

Nkulikiyimana ni umwe mu bakinnyi bakiri bato mu b'Abanyarwanda