Champions League: Ronaldo yafashije Juventus gusezerera Atlético Madrid, Manchester City inyagira Schalke

Yanditswe na Eric Tony Ukurikiyimfura
Kuya 13 Werurwe 2019 saa 07:35
Yasuwe :
0 0

Ibitego bitatu byatsinzwe na Cristiano Ronaldo byafashije ikipe ya Juventus de Turin gukomeza muri ¼ cya UEFA Champions League, isezereye Atlético Madrid ku bitego 3-2 mu mikino yombi, ni nyuma yo kuyitsinda 3-0 mu mukino wabereye mu Butaliyani mu ijoro ryo kuri uyu wa Kabiri.

Juventus yari yatsinzwe ibitego 2-0 mu mukino ubanza wabereye muri Espagne mu kwezi gushize, yari yakiriye uyu mukino wo kwishyura, aho yatangiye iri hejuru cyane, yotsa igitutu Atlético Madrid ku buryo bukomeye.

Ku munota wa gatatu gusa, kapiteni wa Juventus Giorgio Chiellini yatsinze igitego cyanzwe hifashishijwe ikoranabuhanga rya VAR, aho byagaragaye ko Ronaldo yakoreye ikosa umunyezamu Jan Oblak wasaga n’uwamaze gushyikira umupira mu biganza bye, Cristiano Ronaldo agatuma umucika ugasanga mugenzi we watsinze.

Atlético Madrid yasaga n’iyibuze, yagerageje uburyo bwa mbere bugana mu izamu rya Juventus ku munota wa 21 mbere y’uko Cristiano Ronaldo afungura amazamu ku munota wa 27 ku mupira yatsindishije umutwe ubwo wari uhinduwe na Federico Bernardeschi.

Juventus yagaragagaza inyota yo kwishyura ibitego yatsinzwe hakiri kare, yabonye ubundi buryo burimo umupira w’umuterekano watewe na Bernardeschi ujya hanze ndetse n’undi mupira Ronaldo yateresheje umutwe na wo ujya hanze.

Habura iminota ibiri ngo amakipe yombi ajye kuruhuka, umunyezamu wa Atlético Madrid Jan Oblak yarokoye ikipe ye ubwo yakuragamo umupira Giogio Chiellini yateresheje umutwe mbere y’uko Álvaro Morata ahusha uburyo bwiza ku ruhande rw’iyi kipe yo muri Espagne mu minota y’inyongera y’igice cya mbere.

Nyuma y’iminota itatu gusa amakipe yombi avuye mu karuhuko, Cristiano Ronaldo yatsindiye Juventus igitego cya kabiri ku mupira wahinduwe na Joao Cancelo, uyu rutahizamu ashyiraho umutwe, Jan Oblak agarura umupira wamaze kugera mu izamu.

Angel Correa winjiye mu kibuga asimbura ku ruhande rwa Atlético Madrid, Mario Mandžukić na Moise Kean wamusimbuye ku ruhande rwa Juventus, bose bahushije ubundi buryo bwashoboraga gufasha amakipe yabo muri uyu mukino mbere y’uko Cristiano Ronaldo atsinda igitego cya gatatu cyahaye Juventus gukomeza muri ¼ kuri penaliti yatanzwe ubwo Correa yagushaga Fernando Bernadeschi mu rubuga rw’amahina ku munota wa 86.

Umukino warangiye Juventus itsinze ibitego 3-0 ikomeza muri ¼ cya UEFA Champions League. Ibitego bitatu Cristiano Ronaldo yatsinze muri uyu mukino, byamufashije kuzuza 124 muri iri rushanwa ndetse akaba ari we watsinze byinshi mu mateka yaryo, aho akurikiwe na Lionel Messi wa Barcelone ufite ibitego 106.

Undi mukino wa 1/8 cya UEFA Champions League wabaye kuri uyu wa Kabiri, Manchester City yatsinze Schalke 04 ibitego 7-0, iyisezerera ku giteranyo cy’ibitego 10-2 mu mikino yombi.

Sergio Agüero yatsinze ibitego bibiri muri uyu mukino, Leroy Sané, Raheem Sterling, Bernardo Silva, Phil Foden na Gabriel Jesus buri wese atsinda igitego kimwe.

Imikino ya 1/8 isigaye irakinwa kuri uyu wa Gatatu guhera saa 22:00, aho FC Barcelone irakira Olympique Lyonnais banganyije ubusa ku busa mu mukino ubanza mu gihe na Bayern Munich yakira Liverpool. Amakipe yombi nayo yanganyije ubusa ku busa mu mukino ubanza.

Ikosa Cristiano Ronaldo yakoreye umunyezamu Jan Oblak bigatuma igitego batsinze hakiri kare bacyanga
Morata wahuraga na Juventus yakiniye yagiye arakaranya cyane na Giorgio Chiellini
Cristiano Ronaldo atsinda igitego cya mbere
Cristiano Ronaldo na bagenzi bishimira igitego cya gatatu cyabahesheje gukomeza
Byari ibyishimo bikomeye ku bakunzi ba Juventus yari mu rugo ubwo basezereraga Atletico Madrid
Ronaldo yatsinze igitego cya gatatu kuri penaliti
Angel Correa yagushije Fernando Bernadeschi mu rubuga rw'amahina hatangwa penaliti
Sergio Aguero yatsindiye ikipe ye ibitego bibiri muri uyu mukino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza