Kuri uyu wa Gatanu, tariki ya 3 Nyakanga 2026, ni bwo iri shyirahamwe ryemeje amakipe azakina iri rushanwa rizakinwa kuva tariki ya 24 Nyakanga kugeza ku ya 8 Kanama 2026, rikazakinirwa kuri Stade Amahoro na Kigali Pelé Stadium.

Imwe mu makipe azakina iri rushanwa harimo Simba SC yo muri Tanzania yaherukaga kurikina mu myaka umunani ishize.

Umuyobozi Nshingwabikorwa w’agateganyo wa CACAFA, Jean Sseninde, yavuze ko iri rushanwa rizafasha amakipe yo mu Karere kwitegura neza amarushanwa yo mu mwaka utaha wa 2026/27, arimo CAF Champions League na CAF Confederation Cup.

Yagize ati “Twishimiye ko iri rushanwa rigiye kudufasha guha amahirwe amakipe yacu akitegura amarushanwa ya CAF azatangira muri Nzeri 2026.

Kugeza ubu hemejwe amakipe 11 azakina iri rushanwa, ariko hakaba indi imwe izatangazwa ku itariki ya 6 Nyakanga 2026, ikaba iya 12.

Ayo makipe ni APR FC na Rayon Sport zizahagarira u Rwanda, Simba SC yo muri Tanzania, Vipers SC yo muri Uganda, Al Hilal SC na El Merrikh SC zo muri Sudani na Gor Mahia FC yo muri Kenya.

Hari kandi Mogadishu City FC yo muri Somalia, Jamus SC yo muri Sudani y’Epfo, FC Garde Républicaine yo muri Djibouti na KVZ FC yo muri Zanzibar.

Mu 2025, muri CECAFA Kagame Cup yabereye i Dar es Salaam muri Tanzania, APR FC yahagarariye u Rwanda yegukanye umwanya wa gatatu, mu gihe igikombe cyatwawe na Singida Black Stars.

Iri rushanwa riterwa inkunga na Perezida Paul Kagame kuva mu 2002, ryaherukaga kubera mu Rwanda mu 2019.

APR FC iheruka muri CECAFA Kagame Cup yabaye iya gatatu

Simba SC izitabira CECAFA Kagame Cup nyuma y'imyaka umunani