Nyuma y’uko Arsenal igeze ku mukino wa nyuma wa UEFA Champions League isezereye Atlético Madrid ku bitego 2-1 ku wa Kabiri, Aston Villa na Crystal Palace na zo zateye ikirenge mu cyayo.

Aston Villa itozwa na Unai Emery, yari yatsinzwe igitego 1-0 mu mukino ubanza, yanyagiye Nottingham Forest ibitego 4-0 ku wa Kane, igera ku mukino wa nyuma wa Europa League izahuriraho na Freiburg yo mu Budage, aho uzabera i Istanbul ku wa 20 Gicurasi.

Mu buryo busa nk’ubwo, Crystal Palace yari yatsinze ibitego 3-1 mu mukino ubanza, yasezereye Shakhtar Donetsk nyuma yo kuyitsinda ibitego 2-1 mu mukino wo kwishyura wabereye kuri Selhurst Park, igera ku mukino wa nyuma wa Conference League izahuriraho na Rayo Vallecano yo muri Espagne ku wa 27 Gicurasi.

UEFA Conference League yashyizweho mu myaka irindwi ishize, yabaye irushanwa rya gatatu ry’i Burayi nyuma y’uko Cup Winners’ Cup ikuweho mu 1999.

Kuba amakipe atatu yo mu Bwongereza yagera ku mukino wa nyuma w’amarushanwa yose y’i Burayi byari bigiye kuba mu mwaka w’imikino ushize, ubwo Chelsea yatwaraga Conference League naho Tottenham igatsinda Manchester United ku mukino wa nyuma wa Europa League.

Gusa ikipe yari isigaye muri Champions League yari Arsenal yahise itsindwa na Paris Saint-Germain muri ½.

Si ubwa mbere Shampiyona y’Icyiciro cya Mbere mu Bwongereza yari igize byibuze amakipe atatu ku mikino ya nyuma ya Champions League na Europa League.

Mu 2021, Kai Havertz yatsinze igitego rukumbi ubwo Chelsa yatsindaga Manchester City ku mukino wa nyuma wa Champions League mu gihe Manchester United yatsindiwe ku mukino wa nyuma wa Europa League.

Mu 2019, Liverpool yatsinze Tottenham ku mukino wa nyuma wa Champions League mu cyumweru kimwe ubwo Chelsea yatsindiraga Arsenal i Baku ku mukino wa nyuma wa Europa League.

Ni mu gihe mu 2006, amakipe yose y’u Bwongereza yatsinzwe imikino ya nyuma: Arsenal itsindwa na FC Barcelone muri Champions League naho Middlesbrough inyagirwa ibitego 4-0 na FC Seville muri UEFA Cup.

Kugira ngo ubone aho amakipe y’u Bwongereza yatwaye ibikombe bibiri cyangwa bitatu by’amarushanwa y’u Burayi yari ahari, birasaba gusubira inyuma indi myaka 20.

Mu 1984, Liverpool yegukanye igikombe cya kane cy’u Burayi itsinze AS Roma naho Tottenham itsinda Anderlecht ku mukino wa nyuma wa UEFA Cup yegukanye ku nshuro ya kabiri.

Liverpool yegukanye kandi European Cup mu 1981 itsinze Real Madrid igitego 1-0 ku mukino wa nyuma wabereye i Paris, mu gihe Ipswich Town yatozwaga na Bobby Robson yatsinze AZ Alkmaar ku mukino wa nyuma wa UEFA Cup.

Hari ibindi bihugu byagize amakipe ku mikino ya nyuma y’aya marushanwa yose?}

U Butaliyani bwagize amakipe abuhagarariye ku marushanwa yose y’i Burayi inshuro nyinshi, ariko inshuro iheruka ni mu 2023, nubwo ayo makipe yose yatsinzwe: Inter de Milan muri Champions League, AS Roma muri Europa League na Fiorentina muri Conference League.

Amakipe yo muri Serie A yegukanye ibikombe bibiri muri bitatu mu 1993/94, ubwo Milan AC yatwaraga Champions League na Inter igatwara UEFA Cup mu gihe Parma yatsinzwe na Arsenal ku mukino wa nyuma wa Cup Winners’ Cup.

Yatwaye kandi ibikombe bibiri, atakaza kimwe mu 1992/93 na 1988/89.

Mu 1989/90, amakipe yo mu Bitaliyani yegukanye amarushanwa atatu y’u Burayi ubwo Milan AC yatwaraga Champions League, Juventus igatsinda Fiorentina muri UEFA Cup naho Sampdoria ikegukana Cup Winners’ Cup.

Amakipe yo muri Espagne yageze ku mikino ya nyuma y’amarushanwa atatu mu 1985/86, ubwo Real Madrid yegukanaga UEFA Cup, FC Barcelone igatsindirwa ku mukino wa nyuma wa European Cup mu gihe Atlético Madrid yatsindiwe ku mukino wa nyuma wa Cup Winners’ Cup.

Arsenal, Aston Villa na Crystal Palace zageze ku mikino ya nyuma y'amarushanwa atatu y'u Burayi