Bite bya Jacques Tuyisenge muri APR FC?

Yanditswe na Eric Tony Ukurikiyimfura
Kuya 11 Nzeri 2020 saa 08:38
Yasuwe :
0 0

APR FC ikomeje ibiganiro na rutahizamu w’Umunyarwanda, Tuyisenge Jacques, kugira ngo azayikinira mu myaka ibiri iri imbere.

Tuyisenge ari mu Rwanda guhera tariki ya 24 Kanama nyuma yo gutangaza ko yatandukanye na Petro Atlético yari amaze umwe akinira muri Angola.

Uyu rutahizamu ngenderwaho mu ikipe y’Igihugu ‘Amavubi’, amaze iminsi mu biganiro na APR FC, ariko amakuru IGIHE ifite ni uko bitararangira kugira ngo ashyire umukono ku masezerano.

Ku wa Kane nimugoroba hongeye kuba ibindi biganiro byahuje impande zombi, ariko zitandukana nta kigezweho ku bijyanye n’igihe uyu mukinnyi yazakinira ikipe y’ingabo niba ari umwaka umwe cyangwa ibiri ndetse kuri uyu wa Gatanu, ibiganiro birakomeza.

Bamwe mu ba hafi y’uyu mukinnyi wifuzwaga n’amakipe arimo Yanga SC, bavuga ko APR FC imuha miliyoni 40 Frw n’umushahara wa miliyoni 3.5 Frw ku kwezi ngo asinye imyaka ibiri mu gihe we ashaka gusinya umwaka umwe.

Ubuyobozi bwa APR FC bwirinze kugira byinshi buvuga kuri ibi, ariko bwemeza ko Tuyisenge ari umukinnyi mwiza buri kipe yakwifuza.

APR FC yatwaye Shampiyona ya 2019/20 idatsinzwe, yihaye intego yo kugera mu matsinda ya CAF Champions League byaba ngombwa ikaharenga.

Uretse kongerera amasezerano y’imyaka ibiri umutoza mukuru w’Umunya-Maroc; Adil Mohamed Erradi, APR FC yazanye umutoza wungirije; Umunya-Argentine Pablo Morchón.

Yaguze kandi abakinnyi bashya barimo Bizimana Yannick watsinze ibitego 24 mu myaka ibiri ishize ya Shampiyona akinira AS Muhanga na Rayon Sports, Nsanzimfura Keddy wakinaga muri Kiyovu Sports, Ndayishimiye Dieudonné na Ruboneka Jean Bosco bavuye muri AS Muhanda ndetse n’umunyezamu Ishimwe Jean Pierre wazamuwe mu ikipe nkuru, avuye muri Intare FC.

Abandi bakinnyi bivugwa ko APR FC yifuza muri iyi mpeshyi barimo Meddie Kagere ugifite amasezerano y’umwaka muri Simba SC yo muri Tanzania, myugariro Kato Samuel Nemeyimana ufite amasezerano y’umwaka muri KCCA yo muri Uganda na Mugisha Gilbert ugifite amasezerano y’umwaka muri Rayon Sports.

Ibiganiro birakomeje hagati ya APR FC na Tuyisenge Jacques

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .