Kuri ubu Barcelone iri ku mwanya wa mbere n’amanota 88, irusha 11 Real Madrid ya kabiri mu gihe hasigaye imikino ine ngo Shampiyona irangire.

Intsinzi Real Madrid yabonye kuri Espanyol yatsinze ibitego 2-0 ku mugoroba wo ku Cyumweru, yatumye FC Barcelone igomba gutegereza ikareba niba izatwarira igikombe ku mukino wa El Clásico uzazihuza ku Cyumweru gitaha.

Barça ikeneye kunganya gusa uyu mukino uzabera kuri Camp Nou, ubundi ikegukana igikombe cya Shampiyona y’uyu mwaka w’imikino wa 2025/26.

Ibitego bya Vinícius Júnior ku munota wa 55 n’uwa 66 ni byo byahesheje ikipe ye intsinzi, bisubika ibirori bya FC Barcelone yari guhita irara yegukanye igikombe iyo Real Madrid idatsinda.

Amateka azandikwa kuri El Clasico?

Mu myaka 97 ishize ya La Liga, nta kipe iregukanira igikombe kuri El Clásico.

Gutsinda kwa Real Madrid ku Cyumweru kwatumye itazakomera amashyi FC Barcelone mbere y’uyu mukino uzazihuza.

Mu gihe kuri ubu FC Barcelone irusha Real Madrid amanota 11, ishobora guca agahigo ko gutwara igikombe cya Shampiyona ya Espagne harimo ikinyuranyo cy’amanota menshi, nyuma ya 15 yarimo itwara icyo mu mwaka w’imikino wa 2012/13.

Barça niramuka itsinze imikino ine isigaje, izasoza Shampiyona ifite amanota 100, igere ku gahigo ka Real Madrid yagejeje ayo manota mu 2011/12 ndetse na yo ubwayo (FC Barcelone) mu 2012/13.

Ibyo kandi nibigeraho, Barcelone izaba iciye agahigo ko gutsinda imikino myinshi (33) mu mwaka w’imikino umwe. Yanganyije inshuro imwe.

Ni mu gihe ari umwaka w’imikino wa kabiri Real Madrid igiye gusoza nta gikombe na kimwe yegukanye kuva mu 2009/10. Indi nshuro byabaye ni mu 2020/21.

Ibitego bya Vinícius Júnior byafashije Real Madrid gutsinda Espanyol, FC Barcelone ntiyahita yegukana La Liga ya 2025/26

FC Barcelone izegukana Shampiyona ya Espagne niramuka itsinze cyangwa ikanganya na Real Madrid zizahura ku Cyumweru