00:00:00 IGIHE NETWORK KN KINYARWANDA EN ENGLISH FR FRANCAIS

AS Kigali yananiwe gukura intsinzi muri Djibouti

Yanditswe na Iradukunda Olivier
Kuya 10 September 2022 saa 08:59
Yasuwe :

AS Kigali yanganyirije muri Djibouti na ASAS Djibouti Télécom 0-0, mu mukino ubanza wa CAF Confederations Cup wabereye kuri Stade El Hadj Hassan Gouled.

Uyu mukino waranzwe n’ubwitabire buke ahanini bitewe nuko iki gihugu kidafite abaturage benshi kandi akaba atariyo kipe ifite abakunzi benshi muri Djibouti. Ni umukino wayobowe n’umusifuzi waturutse muri Tanzania.

Mu ntangiriro z’uyu mupira wakiniwe mu kibuga hagati ariko AS Kigali itangira irushwa kuko ASAS yayitanze kwinjira mu mukino. Nubwo byagenze gutyo ariko amahirwe yabonetse mbere yari ku musore Haruna Niyonzima, bakiza izamu n’akaboko ariko umusifuzi yemeza ko nta cyabaye.

Mu minota icumi ya mbere kandi ikipe ya AS Kigali yagaragaje kutava imbere y’izamu imaze kwinjira mu mukino, ikomeza kubona ubundi buryo ariko birangira Hussein Tchabalala mu mipira yabonaga nta n’umwe aboneje mu izamu.

Ikipe ASAS ntabwo nayo yari isinziriye kuko ku munota wa 15 yabonye amahirwe aturutse mu kutumvikana kwa ba myugariro ba AS Kigali ariko ntibyagira icyo bitanga.

Iminota 20 ya mbere yose AS Kigali yotsaga igitutu ASAS, ariko nayo ikanyuzamo ibifashijwemo na Gabriel Dhazel igasatira kugeza ubwo yabonye ikosa ryakozwe na Bishira Ratif, haboneka umupira w’umuterekano washoboraga kuvamo igitego ariko biba iby’ubusa.

AS Kigali yarushijwe hagati ku buryo bugaragara, ikibona ko biri bugorane yatangiye umuvuno wo gukoresha imipira yihuta cyane kuri yerekeza mu mpande zariho Hussein Tchabalala na Tuyisenge Jacques.

Muri uko gukoresha imipira miremire, AS Kigali yegereye izamu cyane ariko ibura ikindi gitego cyari cyabazwe ku mahirwe yari abonywe na Tuyisenge. Uyu mupira umunyezamu wa ASAS yawushyize muri koruneri.

Nyuma y’iyi minota hagombaga kubaho akaruhuko ko kunywa amazi kubera ubushyuhe, ariko ntabwo byigezwe byubahirizwa kuko ikigero ubushyuhe bwariho kitari gikanganye cyane.

Jascque Tuyisenge wari wahuye n’ikibazo cyo gutakaza imipira myinshi ku ruhande rw’ibumoso, umutoza Casa Mbungo André yamuhinduriye umwanya, asatira ahereye ku ruhande rw’iburyo agurana na Tchabalala ajya i Bumoso.

Igice cya mbere kitigeze cyongerwaho umunota n’umwe cyarangiye ari 0-0.

Mu ntangiriro z’igice cya kabiri nta mpinduka z’abakinnyi zabayeho ku makipe yombi gusa umutoza Casa Mbungo abwira abakinnyi be barimo Kalisa Rashid Kalisa, Nyarugabo Moise na Ndikumana Landry kujya kwishyushya.

AS Kigali yakomeje gusatira izamu no mu gice cya kabiri ku buryo ku munota wa 53’ Tchabalala yongeye gutera mu izamu n’umutwe, umunyezamu akomeza kumubera ibamba.

Ku munota wa 61 umutoza Casa Mbungo yakoze impinduka akuramo Jacques Tuyisenge utagaragaje umusaruro nk’uko bigomba, amusimbuza Nyarugabo Moise kugira ngo arebe ko yakongera imbaraga mu mpande zari zatangiye gucika intege.

Nyarugabo yahinduye byinshi AS Kigali biboneka ko ishobora kubona igitego nyuma yo gusatira izamu cyane. Abakinnyi ba ASAS Djibouti Télécom ku munota wa 64 babiteye imboni, bazamukana umupira bawukubita igiti cy’izamu, AS Kigali ibona ko amazi atari ya yandi irongera irakanguka.

Ku munota wa 78 umutoza Casa Mbungo yakoze indi mpinduka akuramo Haruna Niyonzima wavuyemo atishimye asimburwa na Ndikumana Landry. Akigera mu kibuga yahereje umupira mwiza Tchabalala ariko nawo awutera hanze.

AS Kigali yabonye ubundi buryo bwa Juma Lawrence ku mupira yahawe ari wenyine na Nyarugabo wahinduye umupira kuva akijyamo, gusa nawo awiterera mu ntoki z’umuzamu.

Iminota 90 y’umukino yarangiye amakipe yombi nta n’imwe ibashije kunyeganyeza incundura ry’indi. Bongeraho iminota itatu ariko bikomeza kugorana ku mpande zombi, umukino urangira ari 0-0.

Abakinnyi babanjemo muri AS Kigali ni Ntwali Fiacre, Bishira ratif, Kakule Mugheni Fabrice, Haruna Niyonzima, Jacques Tuyisenge, Hassan Rugirayabo, Niyonzima Olivier Seif, Ahoyikuye Jean Paul, Kwitonda Ally, Juma Lawrence, Hussain Tchabalala.

Umukino wo kwishyura uzakinirwa mu Rwanda ku wa Gatatu tariki 18 Nzeri 2022, kuri Stade ya Huye.

AS Kigali yasatiriye cyane ariko igitego kirabura
Hussein Tchabalala ntiyabonye izamu muri uyu mukino
Haruna Niyonzima agerageza kurema uburyo bw'igitego
Abakinnyi ba AS Kigali babonye amahirwe menshi ariko ntibabona igitego
Abakinnyi 11 ba AS Kigali babanje mu kibuga
Umusifuzi wayoboye umukino ni uwo muri Tanzania

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .