00:00:00 IGIHE NETWORK KN KINYARWANDA EN ENGLISH FR FRANCAIS

AS Kigali yabambiwe i Gologota, Espoir FC ikomeza urugendo rugana mu manga

Yanditswe na Iradukunda Olivier
Kuya 21 Ukuboza 2022 saa 08:03
Yasuwe :

AS Kigali yatsinzwe na Sunrise FC inanirwa kwikura kuri Stade Gologota i Nyagatare mu gihe Espoir FC ikomeje kugana ahabi nyuma yo gutsindwa na Gorilla FC mu mikino y’Umunsi wa 15 wa Shampiyona yakinwe kuri uyu wa Gatatu, tariki ya 21 Ukuboza 2022.

Ikipe y’Abanyamujyi b’i Kigali iri ku mwanya wa mbere ku rutonde rw’agateganyo muri Shampiyona yatsikiriye kuri Stade Nyagatare, yahawe akabyiniriro ka Gologota, itsindwa ibitego 2-1.

I Rusizi, Espoir FC yakinnye umukino wa mbere nyuma yo guhagarika Umutoza wayo Mukuru, Bisengimana Justin kubera umusaruro nkene, yatsinzwe na Gorilla FC igitego 1-0.

AS Kigali yagiye i Nyagatare yizeye kubona intsinzi ariko itungurwa no kubona nta gitego na kimwe yinjije mu minota 45 y’igice cya mbere. Iyi kipe y’Umujyi wa Kigali isa n’iyasuzuguye umukino ibanza hanze abakinnyi basanzwe bayirwanaho aho rukomeye.

Umutoza Casa Mbungo André yifashishije abakinnyi batarimo Rutahizamu ufite ibitego byinshi muri Shampiyona kugeza ubu Hussein Tshabalala, Haruna Niyonzima na Kalisa Rachid bayifasha mu kibuga hagati.

Mu gice cya kabiri yasanze amazi atari ya yandi, ashyira mu kibuga Tshabalala na Haruna Niyonzima ngo bongere imbaraga hagati mu kibuga no mu busatirizi.

Ibi yabyibutse yatinze kuko nubwo batangiye gusatira cyane, ku munota wa 58, Samson Babuwa yabatsinze igitego cya mbere ku mupira yaherejwe neza na Yafessi Mubiru.

Nyuma y’iminota 10, Mubiru Yafessi wari mwiza cyane muri uyu mukino yaciye mu rihumye Bishira Latif, atsinda igitego cya kabiri muri uyu mukino ku munota wa 68.

Abakinnyi ba AS Kigali byabasabye imbaraga nyinshi kugira ngo bishyure igitego kimwe cyabonetse ku munota wa 86, gitsinzwe na Jacques Tuyisenge waherejwe umupira na Dusingizimana Gilbert.

AS Kigali ntabwo yahiriwe n’uyu munsi byashobokaga ko yitwara neza, igashimangira gusoza imikino ibanza ya Shampiyona y’u Rwanda iyoboye izindi.

AS Kigali yatsindiwe na Sunrise FC i Nyagatare inanirwa gushimangira umwanya wa mbere

Espoir FC iri kuvugwamo ibibazo bitandukanye by’abatoza n’abakinnyi badashoboye, yatsinzwe umukino wayo yakiriyemo Gorilla FC. Igitego kimwe cyabonetse ku munota wa 26 w’umukino gitsinzwe na Nshimyimana Emmanuel ni cyo cyatumye iyi kipe yo mu Karere ka Rusizi iguma ku mwanya wa nyuma n’amanota arindwi mu mikino 15.

Ntabwo aya makipe ari yo yakinnye yonyine uyu munsi kuko Rutsiro FC yatsinze Bugesera FC ibitego 2-1.

Police FC na yo ntiyahiriwe n’imikino ibanza ya Shampiyona kuko yasoje iri ku mwanya wa 11 ku rutonde rw’agateganyo n’amanota 21 gusa. Iyi kipe y’abashinzwe umutekano yanganyirije mu Majyaruguru na Musanze FC igitego 1-1.

Mukura VS iri kwiyubaka buhoro buhoro nyuma yo gufata politiki yo gukinisha abakinnyi bato, yerekeje mu Karere ka Ngoma ihatsindira Rwamagana City ibitego 2-1 bya Robert Mukogotya.

Kugeza ubu, AS Kigali iracyari ku mwanya wa mbere n’amanota 30 mu mikino 15, ikurikiwe na Rayon Sports ifite 28, APR FC [27], Kiyovu Sports [27] na Gasogi United ifite amanota 25, zo zimaze gukina imikino 14.

Imikino ya Shampiyona izakomeza ku wa Kane, tariki ya 22 Ukuboza ubwo Etincelles FC izakira APR FC mu gihe ku wa Gatanu, tariki ya 23 Ukuboza 2022, Marines FC yakire Kiyovu Sports. Uyu munsi uzasozwa n’umukino w’ishiraniro uzahuza Rayon Sports na Gasogi United FC.

Imikino y’Umunsi wa 15 wa Shampiyona:

Ku wa Gatatu, tariki ya 21 Ukuboza 2022

  Musanze FC 1-1 Police FC

  Espoir FC 0-1 Gorilla FC

  Sunrise FC 2-1 AS Kigali FC

  Rwamagana City 1-2 Mukura VS

  Rutsiro FC 2-1 Bugesera FC

Ku wa Kane, tariki ya 22 Ukuboza 2022

  Etincelles izakina na APR FC [Stade Umuganda, 15:00]

Ku wa Gatanu, tariki ya 23 Ukuboza 2022

  Marines FC Vs Kiyovu Sports [Stade Umuganda, 15:00]

  Rayon Sports VS Gasogi United [Stade de Kigali, 18:00]

Munyeshyaka Gilbert "Lukaku" yishimira igitego cy'ikipe ye ya Musanze FC
Police FC yananiwe gukura amanota atatu mu nzara za Musanze FC
Uyu mukino wahuje impande zombi wari ishiraniro
Umutoza wa Police FC, Mashami Vincent, ntiyabyumvaga kimwe n'umusifuzi ku byemezo yafashe
Nsabimana Eric Zidane wa Police FC yakinanaga imbaraga nyinshi muri uyu mukino
Abakinnyi n'abatoza ba Police FC bishimira igitego cyo kwishyura
Abakinnyi ba Police FC bishimira igitego cyabagaruye mu mukino
Abafana ba Musanze FC biganjemo abato bari bahagaritse imitima mu minota ya nyuma
Mugiraneza Jean Baptiste "Migi" n'Umunyezamu Mvuyekure Emery nta mwanya uhagije babona mu ikipe
Abafana ba Police FC biganjemo abacunga umutekano bari baserutse ku bwinshi biteguye kuyishyigikira
Kuri Stade Ubworoherane, Musanze FC iba ifite abafana benshi bayiri inyuma

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .