Kuri uyu wa Kane, tariki ya 26 Werurwe 2026, ni bwo kuri Kigali Pele Stadium hatangiye gukinirwa imikino yo mu Itsinda B rya FIFA Series 2026, ririmo amakipe ane.

Aruba yakiriye Macau, ndetse itangira neza umukino kuko ku munota wa gatanu yabonye igitego cya mbere cyatsinzwe na Carlito Fermina, nyuma yo guherezwa umupira na Kymani Nedd.

Macau yananiwe kwisanga mu mukino yatsinzwe igitego cya kabiri ku munota wa 13, gishyizwemo na Jaybrien Romano waherejwe umupira na Gello Robertha.

Romano wari mwiza mu gice cya mbere cy’uyu mukino, yashyizemo igitego cya gatatu ku munota wa 16, ari na cyo cya nyuma cyabonetse mbere y’uko amakipe ajya mu karuhuko.

Aruba yarushije cyane Macau, yashyizemo igitego cya kane, cyatsinzwe na Conner van Kilsdonk, winjiye mu kibuga asimbuye Paul Nickelson.

Macau yakoze impinduka ikura mu kibuga abakinnyi batandatu. Mu kibuga havuyemo Chi Chio, Dion Carlos Choi, Weng-Kin Lam, Wai-Hin Leong, Hou-In Si na Pan Si Kit, hajyamo Leong Ka Hang, Lei Hou-In, Cho-Fong Huang, Cheong Ka Long, Jorge Vitorino na Marcos Cheong.

Leong Ka Hang yahise atsinda igitego cya mbere cya Macau ku munota wa 87, ari na cyo cya nyuma cyabonetse muri uyu mukino warangiye ari ibitego 4-1, Aruba igera ku mukino wa nyuma, naho Macau ikazahatanira umwanya wa gatatu mu Itsinda B.

Umukino ukurikiyeho urahuza Tanzania na Liechtenstein, kuri Kigali Pele Stadium.

Huang Cho Fong wa Macau ari kwishyushya

Lei Hou In wa Macau ntabwo ari mu bakinnyi babanje mu kibuga

Abakinnyi ba Aruba bishyushya mbere yo gutangira umukino

Aruba ni yo yari yakiriye umukino

Abakinnyi 11 Macau yabanje mu kibuga

Uwikunda Samuel ni we wasifuye umukino

Abakinnyi 11 Aruba yabanje mu kibuga

Goitia Amancio wa Macau ari kunyuza umupira kuri Fermina Carlito wa Aruba

Aruba yabonye igitego cya mbere hakiri kare

Aruba yarushije cyane Macau

Aruba yageze ku mukino wa nyuma

Perezida wa FERWAFA, Shema Ngoga Fabrice, yakurikiye uyu mukino

Umunyamabanga wa Leta muri Ministeri ya Siporo, Rwego Ngarambe, yari mu bakurikiye umukino wa mbere wa FIFA Series

Aruba yishakiye abafana kubera kwiharira umukino

Aruba yanyagiye Macau

Macau yananiwe kwisanga mu mukino

Amafoto: Umwari Sandrine