Ni umukino w’umunsi wa 35 wa Shampiyona y’u Bwongereza wabereye kuri Tottenham Hotspur Stadium ku Cyumweru, tariki ya 28 Mata 2024.

Tottenham Hotspur niyo yatangiye neza uyu mukino, kuko yahererekanyaga neza mu kibuga hagati, Arsenal yakinaga umukino ugomba kuyifasha kugumana umwanya wa mbere iwinjiramo nyuma.

Nyuma y’iminota 10 ni bwo Arsenal yawinjiyemo neza ndetse inazamura icyizere ku wa 15 ubwo Pierre-Emile Hoejbjerg wa Tottenham yitsindaga igitego, igatangira kuyobora umukino.

Hashize iminota umunani Cristian Romero yashatse kwishyura iki gitego ku mutwe yateye aherejwe umupira na James Maddison, gusa kubw’amahirwe make ukubita igiti cy’izamu.

Tottenham yishyuye iki gitego ku munota wa 23 cyinjijwe na Micky van de Ven gusa nyuma yo gusuzuma neza amashusho, umusifuzi Michael Oliver yemeza ko habanje kubamo kurarira.

Bukayo Saka yahise ayikosora atsindira Arsenal igitego cya kabiri hashize iminota ine gusa.

Ibibazo byiyongereye kuri iyi kipe yakiniraga imbere y’abakunzi bayo, ubwo rutahizamu yagenderagaho Timo Werner yagiraga ikibazo mu gice cya mbere bigahita bisaba ko umutoza Ange Postecoglou amusimbuza Brennan Johnson igice cya mbere kitarangiye.

Kai Havertz yatsindiye Arsenal igitego cya gatatu cyinjiye ku munota wa 38, giturutse ku mupira wari uvuye muri koruneri yatewe neza na Declan Rice ku ruhande rw’ibumoso.

Ibi nibyo bitego byinjiye mu gice cya mbere, amakipe yombi ajya mu karuhuko ko guhabwa inama n’abatoza bombi Arsenal iyoboye kuri 3-0.

Postecoglou yatangiranye impinduka mu cya kabiri akuramo Rodrigo Bentancur ashyiramo Pape Matar Sarr kugira ngo akomeze mu kibuga hagati aho yarushwaga cyane na Arsenal.

Byasabye umunota wa 64 kugira ngo Tottenham yishyure igitego icya mbere ku mupira watewe na Cristian Romero ku makosa y’umunyezamu wa Arsenal, David Raya.

Mu mpera z’igice cya kabiri ni bwo Heung-Min Son yatsinze ikindi gitego cya kabiri cya Tottenham Hotspur kuri penaliti yateye iturutse ku ikosa Declan Rice wa Arsenal yakoreye Ben Davies.

Umukino warangiye Arsenal yegukanye amanota atatu y’ingenzi ku bitego 3-2 ndetse ahita anayifasha kuguma ku mwanya wa mbere n’amanota 80 kandi ikarusha ane Manchester City igomba gukina na Nottingham Forest.

Tottenham yagerage kwishyura mu minota ya nyuma y'umukino

Arsenal yatsinze Tottenham yari yatezwe mu rugendo ruyiganisha ku gikombe cya Shampiyona

Bukayo Saka yinjije igitego cya kabiri cya Arsenal

Arsenal yakomeje kuyobora Shampiyona y'u Bwongereza