APR FC yateye utwatsi FERWAFA yayihaniye kurenga ku mabwiriza yo kwirinda COVID-19

Yanditswe na Eric Tony Ukurikiyimfura
Kuya 18 Ukuboza 2020 saa 12:17
Yasuwe :
0 0

Ubuyobozi bwa APR FC bwagaragaje ko butigeze burenga ku mabwiriza yo kwirinda COVID-19 ngo butegure umukino wa gicuti butabiherewe uburenganzira nubwo buri mu makipe aheruka gufatirwa ibihano n’Ishyirahamwe ry’Umupira w’Amaguru mu Rwanda (FERWAFA).

Amwe mu mabwiriza yari yaratanzwe na Minisiteri ya Siporo ubwo amakipe yemererwaga gusukubura imyitozo, harimo ko kugira ngo ikipe ikine umukino wa gicuti, igomba kubisabira uruhushya binyuze muri FERWAFA.

Ku wa 13 Ugushyingo, FERWAFA yafatiye ibihano amakipe atanu arimo APR FC, Rayon Sports, Rutsiro FC, Rwamagana City FC na Alpha FC kubera ko yakinnye imikino ya gicuti nta ruhushya yabisabiye.

Ikipe y’ingabo yaciwe amande ya miliyoni 1 Frw ku mikino itatu ya gicuti mu gihe andi makipe yose yasabwe kwishyura ibihumbi 500 Frw.

Mu itangazo ryashyizwe ku rubuga rwa internet rwa APR FC, ubuyobozi bwayo bwavuze ko “Nta na rimwe APR FC yakinnye imikino ya gicuti n’andi makipe itabisabye ababishinzwe kandi ikabiherwa uburenganzira ngo ikine.”

Imwe mu mikino itatu APR FC yahaniwe, harimo ibiri yahuyemo na Rwamagana City FC ndetse na Rutsiro FC umunsi umwe, ku wa 31 Ukwakira 2020.

Mu itangazo, yashyizemo ibaruwa igaragaza ko yari yasabye uruhushya rwo gukina iyi mikino ku wa 29 Ukwakira 2020 mu gihe ibaruwa yakiriwe n’Ishyirahamwe ry’Umupira w’Amaguru mu Rwanda (FERWAFA) ku wa 2 Ugushyingo 2020. Gusa hari amakuru avuga ko hashobora kuba harabayeho kwemererwa binyuze kuri telefoni.

APR FC iri mu makipe umunani Minisiteri ya Siporo iherutse gutangaza ko yagaragayemo ubwandu bwa COVID-19, yatangaje ko yapimishije abakozi bayo inshuro 10 kuva itangiye imyitozo kugeza itangiye shampiyona, aho yahuye na Kiyovu Sports ku wa 11 Ukuboza 2020.

APR FC yatangaje ko yakinnye imikino yose ya gicuti yarabisabiye uruhushya mu gihe iri mu makipe atanu yahanwe na FERWAFA mu kwezi gushize
Hari amakuru avuga ko APR FC yemerewe gukina imikino ya gicuti yo ku wa 31 Ukwakira nyuma yo kugaragaza ko yanditse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .