00:00:00 IGIHE NETWORK KN KINYARWANDA EN ENGLISH FR FRANCAIS

APR FC na AS Kigali FC zahawe umwanya wo kwitegura imikino mpuzamahanga

Yanditswe na Iradukunda Olivier
Kuya 3 September 2022 saa 02:59
Yasuwe :

APR FC izakina CAF Champions League na AS Kigali izakina CAF Confederations Cup ni yo makipe azahagararira u Rwanda mu mikino y’amakipe yitwaye neza iwayo. Ishyirahamwe ry’Umupira w’Amaguru mu Rwanda (Ferwafa) ryayorohereje riyasubikira imikino ya shampiyona.

Ubunyamabanga Bukuru bwa Ferwafa bwamenyesheje abayobozi b’aya makipe yose, mu gitondo cyo kuri uyu wa Gatandatu ko bugendeye ku mikino afite irimo uwa CAF Champions League na Confederation Cup izaba mu byumweru bibiri biri imbere asubikiwe imikino.

Impamvu yatumye babasubikira imikino harimo ko byagaragaraga ko bidashoboka ko babasha gukina imikino y’umunsi wa kabiri n’uwa gatatu ya Shampiyona. Iyi minsi ya shampiyona izahurirana n’igihe cyo kwitegura ndetse no gukina iyo mikino mpuzamahanga.

Bwongeyeho buti "Kubera izo mpamvu zagaragajwe turabamenyesha ko iyo mikino y’iminsi yavuzwe haruguru isubitswe, bityo tukazabamenyesha amatariki izakinirwaho mu gihe cya vuba."

AS Kigali izajya gukina na ASAS Djibouti Télécom yo muri Djibouti tariki 10 Nzeri 2022, mu gihe umukino wo kwishyura uzabera mu Rwanda tariki ya 18 Nzeri 2022.

AS Kigali yari kwakirwa na Mukura VS tariki ya 8 Nzeri mbere, undi mukino ikawukina na Musanze FC tariki ya 14 Nzeri.

APR FC mu mikino mpuzamahanga izakira US Monastir tariki 10 Nzeri 2022, mu gihe umukino wo kwishyura izajya muri Tunisia tariki ya 18 Nzeri 2022.

Iyi kipe yasubikiwe umukino yari kuzakirwamo na Bugesera FC tariki ya 8 Nzeri 2022 n’uwo yari kuzakira Police FC tariki ya 13 Nzeri 2022.

Usibye aya makipe andi yose azasubukura imikino ya shamiyona ikina umunsi wayo wa kabiri kuva tariki ya 6 kugeza 8 Nzeri 2022, ndetse banakomeze umunsi wa gatatu uzahera tariki ya 13 kugeza 15 Nzeri 2022.

As Kigali ntabwo izakina imikino ikurikira ya Shampiyona kugira ngo yitegure
APR FC yahawe umwanya wo kwitegura imikino mpuzamahanga izakiramo US Monastir

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .