00:00:00 IGIHE NETWORK KN KINYARWANDA EN ENGLISH FR FRANCAIS

Amavubi yatangiye kuhakorera: Dutemberane ku bibuga byo muri ‘Ntare Louisenlund School’ (Amafoto)

Yanditswe na Byiringiro Osée Elvis
Kuya 14 June 2024 saa 12:59
Yasuwe :

Iterambere ry’Ibikorwaremezo bigezweho ni kimwe mu byo u Rwanda rwimirije imbere mu myaka irindwi ishize. Ibi nibyo bituma umunsi ku munsi bikomeje kwiyongera mu bice byose by’igihugu.

Mu Karere ka Bugesera huzuye ishuri ryisumbuye ry’icyitegererezo rya Ntare Louisenlund School riri mu bifite ibibuga byiza kandi byo ku rwego mpuzamahanga.

Iri shuri ryifuza kuba igicumbi cy’imikino, rifite ibibuga mu mikino myinshi nk’umupira w’amaguru ndetse Ikipe y’Igihugu yatangiye no kugikoreraho imyitozo. Hari kandi Basketball, Volleyball, Handball, Tennis, Rugby, Cricket na Piscine.

Umuyobozi muri Ntare Louisenlund School ushinzwe ibijyanye no kwemerera abaza kwiga muri iki kigo, Mbabazi Anne-Grace avuga ko iki kigo cyifuza kuba igicumbi cy’imikino.

Yagize ati “Twifuzaga gukora igicumbi cy’imikino ku buryo habayeho nk’irushanwa ry’amashuri ryazajya risorezwa iwacu. Ntabwo ari ikigo cy’ishuri gusa kuko niba n’Amavubi yaratangiye kuhakorera, birumvikana inzira turimo.”

Kenshi iyo ikigo gifite ibikorwaremezo gikunze no kugira amakipe atandukanye yitabira amarushanwa atandukanye yewe no mu Cyiciro cya Mbere ahanini mu mikino y’intoki.

Mbabazi yakomeje avuga ko bateganya kuzashinga amakipe mu myaka iri imbere.

Ati “ Mu myaka iri imbere nk’ine cyangwa itanu, turatekereza kuzashinga amakipe azashobora kwitabira amarushanwa atandukanye.”

N’ubwo ikibuga cy’umupira w’amaguru cyarangiye ndetse cyatangiye gukoreshwa, biteganyijwe ko aho abafana bicara hazatwikirwa kubera ubushyuhe bwinshi bw’i Nyamata.

Ntare Louisenlund School ni igitekerezo cyakomotse ku bagize umuryango NSOBA (Ntare School Old Boys Association) bize mu ishuri ryisumbuye rya Ntare School yo muri Uganda.

Iri shuri ryubatswe mu Mudugudu wa Musagara, Akagari ka Kanazi mu Murenge wa Nyamata, Akarere ka Bugesera. Rubatswe kuri hegitari 40 muri 60 z’ikibanza cyose, rikazashyirwamo ibikoresho bifite agaciro k’arenga miliyari 5 Frw.

Izina rya Louisenlund ryahawe iri shuri rikomoka ku kigo cyo mu Budage cya Louisenlund School, cyamamaye mu Burayi hose ku bwo gutanga ubumenyi bushingiye kuri siyansi. Ibi bigo byombi byahuje imbaraga kugira ngo bikorane.

Ntare Louisenlund School ni ishuri ryifuza kuba igicumbi cy'imikino
Ikibuga cya Basketball ni uku kigaragara
Ahazakinirwa Tennis hateganyijwe n'aho abafana bazicara
Ikibuga cya Basketball cyubatswe mu buryo bugezweho
Handball ni umwe mu mikino izakinwa muri iki kigo
Ikimenyetso cya Ntare Louisenlund School ni intare nk'uko izina ry'iri shuri ribivuga
Hagati mu kigo ni uko hagaragara
Ikibuga cy'umupira w'amaguru kiri ku rwego mpuzamahanga gifite n'ahagenewe gukorerwa amasiganwa yo kwiruka ku maguru
Ikibuga cy'umupira w'amaguru cyatangiye gukorerwaho imyitozo n'Ikipe y'Igihugu
Aho abafana b'umupira w'amaguru bicara hazatwikirwa
Inzu y'imyidagaduro yagenewe ibirori bitandukanye
Ikibuga cya Volleyball kegeranye n'ibindi by'imikino y'intoki
Cricket ni umwe mu mikino izakinwa muri Ntare Louisenlund School
Piscine izifashishwa mu mukino wo koga
Ikibuga cya Tennis
Amashuri yo muri Ntare Louisenlund School ni uko ameze

Amafoto: Irakiza Yuhi Augustin & Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .