Amakipe akinamo abanyarwanda hanze ntiyahiriwe n’impera z’icyumweru

Yanditswe na Eric Tony Ukurikiyimfura
Kuya 22 Mata 2019 saa 09:55
Yasuwe :
0 0

Impera z’icyumweru dusoje ntizahiriye abanyarwanda bakina hanze kuko abenshi muri bo amakipe bakinira atabashije gutsinda imikino yari afite.

Dore uko bamwe muri bo bitwaye mu makipe yabo:

Simba SC yahangamuwe na Kagera Sugar

N’ubwo yari imaze iminsi yitwara neza muri shampiyona ya Tanzania, Simba SC iheruka gusezererwa na TP Mazembe muri CAF Champions League, yatsinzwe na Kagera Sugar ibitego 2-1 mu mukino wayo wa 24 wa shampiyona.

Uyu mukino wagaragayemo abakinnyi babiri b’abanyarwanda, Haruna Niyonzima na Kagere Meddie. Kapiteni w’Amavubi Haruna Niyonzima yakinnye iminota 45 y’igice cya mbere, asimburwa na John Bocco igice cya kabiri kigitangira.

Simba SC iri ku mwanya wa gatatu n’amanota 60 mu mikino 24 mu gihe Yanga SC ya mbere ifite amanota 74 mu mikino 32.

AFC Tubize ya Nirisarike Salomon ikomeje gutsindwa

Ku wa Gatanu, AFC Tubize ya Nirisarike Salomon, yakinnye umukino w’umunsi wa gatanu mu itsinda B mu mikino bishakamo ikipe izamanuka, itsindwa na OH Leuven ibitego 3-0, inahabwa ikarita itukura. Ibi byatumye AFC Tubize ijya ku mwanya wa nyuma n’amanota atanu mu makipe ane.

Waasland-Beveren ya Bizimana Djihad yabonye intsinzi

Mu guhatanira umwanya wo gukina Europa League mu Bubiligi, Waasland Beveren ya Djihad Bizimana, kuri iki Cyumweru, yatsinze Royal Excel Mouscron ibitego 2-1. Uyu mukinnyi w’umunyarwanda yari mu basimbura ariko ntiyifashishijwe.

Union St.-Gilloise iyoboye itsinda B ry’iyi mikino n’amanota 13 mu mikino itanu mu gihe Waasland Beveren iri ku mwanya wa gatanu n’amanota ane.

Rwatubyaye Abdul yakinnye umukino wa mbere, Sporting Kansas City iranyagirwa

Sporting Kansas City ya Rwatubyaye Abdul yanyagiwe na San Jose Earthquakes ibitego 4-1 mu mukino w’umunsi wa cyenda, ukaba uwa karindwi wa shampiyona ya Major League Soccer muri Western Conference ku makipe yombi, wabaye mu rukerera rwo kuri iki Cyumweru.

Rwatubyaye yakinnye umukino we wa mbere muri iyi kipe yamuguze muri Gashyantare, ubwo yinjiraga ku munota wa 16 asimbuye Matt Besler wari umaze kuvunika.

Kugeza kuri uwo munota, ikipe ye yari imaze gutsindwa ibitego 2-0, umukino warangiye itsinzwe 4-1.

Sporting Kansas City kuri ubu iri ku mwanya wa karindwi n’amanota icyenda, irushwa amanota 13 na Los Angeles FC ya mbere n’amanota 22 mu mikino icyenda.

Ikipe ya Muhire Kevin ikomeje kugana habi

El Dakhleya Sporting ikinamo Muhire Kevin, ku wa Gatanu, yatsinzwe na Smouha SC ibitego 2-0 muri shampiyona ya Misiri. Iyi kipe iri ku mwanya wa 17 n’amanota 26 mu mikino 30 imaze gukina aho irusha inota rimwe Nogoom ya nyuma.

Buildcon FC ya Usengimana Faustin yatakaje umwanya wa mbere

N’ubwo yari imaze iminsi yitwara neza, Buildcon FC ya Usengimana Faustin na Nshimirimana David wavuye muri Mukura, yaratunguwe mu gihugu cya Zambia, itsindwa na Green Eagles igitego 1-0 mu mukino wabaye ku wa Gatanu.

Buildcon FC yahise itakaza umwanya wa mbere mu itsinda B, ijya ku mwanya wa kabiri n’amanota 23 mu mikino 12 mu gihe Green Eagles yahise igira amanota 24.

Gor Mahia ya Jacques Tuyisenge yatakaje amanota, Sofapaka ya Mico iyobora shampiyona

Gor Mahia ikinamo umunyarwanda Tuyisenge Jacques yaraye itakaje amanota abiri mu rugamba rwo gushaka igikombe cya shampiyona ya Kenya ubwo yanganyaga na Ulinzi Stars igitego 1-1.

Gor Mahia ifite ibirarane bine, yahise igira amanota 46 ku mwanya wa kabiri mu gihe Shampiyona ya Kenya ikomeje kuyoborwa na Sofapaka ikinamo Mico Justin n’amanota 48. Sofapaka yo yatsinze Sony Sugar igitego 1-0.

KCB ya Mugabo Gabriel yageze muri ½ cya FKF Shield Cup

Mu mukino w’igikombe cya FKF Shield, kuri iki Cyumweru, KCB ikinamo Mugabo Gabriel yatsinze Bidco United ibitego 4-1 ibona itike ya ½.

Andi makipe yabonye itike ya ½ ni Assad, Bandari FC na Kariobangi Sharks yatsinze Bungoma Superstars habanje kwitabazwa penaliti.

Rwatubyaye Abdul yakinnye umukino wa mbere muri Sporting Kansas City nyuma yo gusimbura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza