Mu gihe yasabwaga gutsinda imikino yose isigaye, Rayon Sports yanganyije na AS Kigali igitego 1-1 kuri sitade Amahoro, irushwa na APR FC ya mbere amanota abiri mu gihe hasigaye imikino ibiri ya shampiyona.

Uyu mukino wabanjirijwe n’imvura yasanze abakinnyi bishyushyaga mbere y’umukino.
Ku munota wa gatanu, ku mupira wari utewe na Mbaraga Jimmy, Mwizerwa Aamini yatsinze igitego cy’umutwe mu izamu rya Rayon Sports ryari ririnzwe na Ndayishimiye Jean Luc “Bakame”.

Kwishyushya kw'amakipe yombi kwaburijwemo n'imvura y'amahindu

Abakinnyi 11 umutoza Luc Eymael yagiriye icyizere cyo kubanza mu kibuga

Ikipe ya AS Kigali yabanjemo guhangana na Rayon Sports

Mbere y'umukino hafashwe umunota wo kwibuka abazize Jenoside yakorewe Abatutsi mu 1994

Ku munota wa 5: Abakinnyi ba AS Kigali bishimira igitego cya Mwizerwa

Ni umukino wakinirwa ku mpande z’imbere ku makipe yombi, Rayon Sports yari itsinzwe igitego hakiri kare yokeje igitutu AS Kigali ari nako itera koroneri nyinshi.

Kuri koroneri yari itewe na Amissi Cedric, myugariro Serugendo Arafat ku munota wa 17 yatsinze umunyezamu wa AS Kigali, Mvuyekure Emery igitego cyo kunganya.

Aya makipe yombi yahagarariye u Rwanda mu mikino nyafurika yagiye kuruhuka anganya igitego 1-1 mu gihe APR FC yanganyaga amanota na Rayon Sports yari imaze gutsinda Amagaju ibitego 2-0.

Rayon Sports yakoresheje imbaraga nyinshi ishaka kwishyura igitego yatsinzwe hakiri kare

Mbere y'uko igitego kijyamo, koroneri yatewe abakinnyi ba AS Kigali bawushyira hanze

Amissi Cedric niwe wateye koroneri yavuyemo igitego

Serugendo Arafat atsinda igitego cyo kwishyura, Rayon Sports 1-1 AS Kigali

Abafana ba Rayon Sports bishimira igitego n'icyizere cyo kuza kubona ikindi

Igice cya kabiri cyatangiranye imbaraga za Rayon Sports yashakaga amanota atatu. Rayon Sports yashoboraga kubona igitego cya kabiri nyuma y’aho myugariro wa AS Kigali, Umwungeri Patrick aguye hasi umukinnyi wa Rayon Sports ateye umupira ukurwamo n’umunyezamu, Fuadi asubijemo ugarurwa na Kayumba Sothere, birangira ishoti rya gatatu rya Amissi Cedric rifashwe neza n’umunyezamu Mvuyekure Emery.

Byabaye ngombwa ko Umwungeri asimburwa na Hakiri Mabula, AS Kigali itangira gukinisha imipira miremire yo ku mutwe.

Umutoza wa Rayon Sports, Luc Eymael, yakuyemo Kagare Meddie na Mwiseneza Djamali hinjiramo Kambale Salita Gentil na Mahoro Nicholas mu rwego rwo kongeramo amaraso mashya bashaka igitego.

Igice cya kabiri cyatangiye bamwe bacitse intege n'icyizere gike

Myugariro wa AS Kigali, Umwungeri Patrick yavunitse ahita ajyanwa mu kwa muganga

Luc Eymael, umutoza wa Rayon Sports na Casa Mbungo Andre wa AS Kigali baha amabwiriza abakinnyi babo

Bumwe mu buryo abafana ba Rayon Sports bari bizeye ko bwahindura umukino ...

Bamwe mu bafana bakomeye ba Rayon Sports bataye icyizere amahirwe ya nyuma babonye ntacyo atanze

Aya niyo mahirwe ya nyuma Rayon Sports yabonye ariko ntibahirwa, umukino uhita urangira

Rayon Sports yabonye amahirwe menshi yo kubona igitego yageragejwe n’abakinnyi bayo nka Sibomana Abuba, Amissi Cedric, Kambale Salita Gentil, Ndayisenga Fuadi na Uwambazimana Leon ariko igitego kirabura.

Nyuma y’aho umusifuzi yerekanye iminota ine yinyongera, Rayon Sports yabonye koroneri yashoboraga kuvamo igitego maze umusifuzi Munyanziza Gervais asifura ko Mahoro yawukozeho n’amaboko anamuha ikarita y’umuhondo.

Umukino warangiye abakinnyi ba Rayon Sports ntibabyakira, bashaka gusagarira umusifuzi bamwe bakubitwa n’abashinzwe umutekano, abafana bateye amacupa arimo amazi mu kibuga ari nako abashinzwe umutekano bahangana muri sitade hejuru. Amissi Cedric yahise ahabwa ikarita y’umutuku.

Ihumure: Umukino urangiye Minisitiri w'imikino, Mitali Protais ashobora kuba yabwiye ijambo ry'ihumure umuyobozi wa Rayon Sports, Ntampaka Theogene

Muhawenimana Claude, umuyobozi w'abafana ba Rayon Sports atumbereye muri sitade amarira yazengaga mu maso

Umukino warangiye abakinnyi ba Rayon Sports basanganira abasifuzi

Muri sitade, abashinzwe umutekano bakubise abafana, nyuma y'aho bamwe bateye amacupa mu kibuga

Umukino urangiye abafana ba Rayon Sports bakomeje guhagarara mu marembo ya sitade imbere ya Minisiteri y'imikino

Mbere yo gukina na AS Kigali, abakinnyi ba Rayon Sports bari bategewe ibihumbi 100 Rwf buri imwe nibatsinda.

Rayon Sports iri ku mwanya wa kabiri n’amanota 56 irushwa na APR FC ya mbere amanota abiri mu gihe AS Kigali iraye ku mwanya wa kabiri n’amanota 45 isigaranye ibirarane bibiri.

Tariki ya 26 Mata 2014, Esperance izakira Rayon Sports kuri sitade ya Kigali isoze ikina na Musanze kuri sitade Amahoro.

[email protected]