Ni isiganwa ry’umunsi umwe ryakinwe kuri iki Cyumweru, tariki ya 26 Mata 2026, ryitabirwa n’abakinnyi 104 bo mu makipe 25, bakoze ibilometero 260 binyura muri iyi mihanda yo mu Bubiligi.

Nk’uko bisanzwe Pogačar nka nimero ya mbere ku Isi mu mukino wo gusiganwa ku magare kandi akiharira cyane uduce tuzamuka, yongeye kwiyerekana muri iri siganwa.

Ubwo hari hasigaye ibilometero 13, uyu mukinnyi wa UAE Team Emirates yari kumwe na Paul Seixas w’imyaka 19 ukinira Decathlon CMA CGM Team, ariko amwereka ko ari igihangange muri uyu mukino.

Pogačar yarinze agera ku murongo usoza isiganwa ari ku mwanya wa mbere, akoresha amasaha atanu, iminota 50 n’amasegonda 28, asiga Seixas w’imyaka 19 amasegonda 45.

Iyi yabaye inshuro ya kane Pogačar yegukanye isiganwa rya ‘Liège - Bastogne - Liège’ nyuma ya 2021, 2024 na 2025.

Ni isiganwa kandi rya kane atwaye mu masiganwa atanu amaze gukina muri uyu mwaka, iryo atatwaye ni Paris-Roubaix yakurikiye Wout van Aert ukinira Visma–Lease a Bike.

Intsinzi ya Pogačar yo kuri uyu munsi yayituye Cristian Camilo Muñoz bakinanaga witabye Imana ku wa Gatanu, tariki ya 24 Mata 2026.

Amasiganwa kandi nk’aya y’umunsi umwe, Pogačar w’imyaka 27 amaze kuyegukana inshuro 13.

Tadej Pogačar yegukanye 'Liège - Bastogne - Liège' ku nshuro ya kane