Mu ijoro ryo ku wa Gatatu, tariki ya 13 Gicurasi 2026, ni bwo abakinnyi, abatoza n’abayobozi ba Al Hilal SC bavuye mu Rwanda nyuma yo kwegukana Igikombe cy’Icyubahiro cya BK Pro League 2025/26 yo mu Rwanda.

Iyi kipe yo muri Sudani yageze mu Rwanda muri uyu mwaka w’imikino, mu rwego rwo kubona aho ikinira imikino yayo ya CAF Champions League, ariko nanone igakina shampiyona mu buryo buhoraho.

Gusa gukinira mu Rwanda ntabwo byari kuyihesha itike yo gukina amarushanwa mpuzamahanga, ari na yo mpamvu bahisemo gusubira iwabo mu mikino ya kamarampaka.

Bakigera iwabo babanje gusura stade yabo yahoze iri mu za mbere muri Afurika, ariko kugeza ubu yamezemo ibyatsi, ndetse igisenge, intebe, inkuta n’ibirahure bya hamwe na hamwe byarangiritse kubera intambara iri muri Sudani.

Al-Hilal Stadium yakiraga abafana barenga 35.000, yangiritse ikibuga cyo gukiniraho ku buryo bukabije, ndetse iramutse igiye kuvugururwa yatwara hafi miliyoni 4$ [5.840.000.000 Frw].

Imikino isigaye muri BK Pro League kuri Al Hilal SC irimo uwa Police FC na Etincelles FC, izakinwa n’ikipe ya kabiri yasigaye mu Rwanda, dore ko muri Sudani yajyanye abakinnyi 25 gusa.

Undi mukino ni uwa Al-Merrikh SC bikunze guhangana cyane, aho bivugwa ko ikipe ya mbere ari yo izagaruka mu Rwanda igakina uyu mukino utaremezwa neza amatariki uzaberaho.

Imyanya y'icyubahiro na yo yarangiritse

Al-Hilal Stadium ntigikinirwaho kubera intambara

Igisenge cya Al-Hilal Stadium na cyo yarangiritse

Abakinnyi bababajwe n'ibyabaye kuri stade bahoze bakiniraho

Al Hilal yavuye mu Rwanda yegukanye igikombe cya shampiyona

Al Hilal Stadium iri mu zari zigezweho muri Afurika

Gusana Al-Hilal Stadium byasaba arenga miliyoni 4$

Al-Hilal Stadium yakiraga abafana ibihumbi 35 yamezemo ibyatsi

Al Hilal yagiye gushaka itike yo gukina imikino mpuzamahanga

Abayobozi ba Al Hilal SC bajyanye n'abakinnyi ku kibuga

Abakinnyi bafotoraga amafoto y'iyi stade iteye agahinda

Intebe za Al-Hilal Stadium zaramenetse

Abakinnyi ba Al Hilal SC basuye stade yabo yangijwe n'intambara