00:00:00 IGIHE NETWORK KN KINYARWANDA EN ENGLISH FR FRANCAIS

Akajagari mu kurambagiriza Amavubi

Yanditswe na Israel Ishimwe
Kuya 18 Mutarama 2023 saa 08:38
Yasuwe :

Ncyumva ko abakinnyi b’abanyamahanga bongeye kugururirwa amarembo nariruhukije! Ni yo nkuru yaryoheye ugutwi kwanjye kurusha izindi numvise kuva mu myaka 10 ishize.

Niba uri umukunzi wa ruhago nawe urabizi cyangwa se wenda tubyumva kimwe. Ibyishimo by’ikirenga nabiherukaga mu 2014 ubwo nabiheshwaga na Daddy Birori watsinze Libya ibitego 3-0, aharurira Amavubi inzira yashoboraga kongera kuyigeza muri CAN nyuma y’imyaka 10.

Ibi byishimo ariko ntibyarambye kuko bidateye kabiri, u Rwanda rwakuwe muri aya marushanwa kuko uyu rutahizamu yari afite ikibazo mu byangombwa yakiniragaho.

Icyo gihe ni bwo hafashwe icyemezo cyo gukinisha abakinnyi b’Abanyarwanda gusa. Ikipe yari itangiye gutanga ibyishimo, yacitse intege iba insina ngufi kugeza aho mu Karere isigaye ari yo rukumbi isigara ku rugo mu gihe ibindi bihugu biba biteraniye ku meza y’abagabo muri Afurika, ndavuga muri CAN.

Sintinda cyane mu nkuru z’akababaro kuko zinsubiza inyuma zigatuma nongera gucika intege no gutekereza ko nazongera kumwenyura bigizwemo uruhare n’abasore baduserukira mu mwambaro w’Amavubi dukunda kandi twemera [Ndavuga bamwe twayanambyeho kuko hari abamaze kuyakuraho amaboko].

Umwaka ushize rero ni bwo nabonye agacu k’impinduka. Bijya gutangira, Amavubi yarambagirijwe umutoza ukomoka muri Espagne, muri ya Kipe y’i Calalonia, ihererekanya umupira 90 igashira.

Ni inkuru nasamiye hejuru kuko numvaga iki gishobora kuba igisubizo kirambye kizashyira iherezo ku musaruro mubi watuzonze.

Ni nako byagenze inzozi zanjye zabaye impamo ndetse imikino ya mbere ya Carlos Alós-Ferrer yaciye amarenga ko yakwitegwaho byinshi.

Uyu mugabo watangiye akura inota muri Afurika y’Epfo imbere ya Mozambique, agatsindwa na Sénégal ku bwa burembe, yahinduye intekerezo za benshi.

Ku babyumvise kimwe nanjye twamubonyemo umutoza ugiye kongera kutwibutsa ibihe byo mu 2004, [benshi mu bana b’ubu ntibabizi kuko bari bataravuka] ubwo Gatete Jimmy, Karekezi Olivier na bagenzi babo bahekaga Amavubi ku rutugu bakayajyana i Tunis mu Gikombe cya Afurika.

Ibi ariko ntibabigezeho bo ubwabo, kuko hari abandi bakinnyi biganjemo n’abanyamahanga bari kumwe, bafatanye urunana muri urwo rugendo rugana ku ntsinzi.

Ni byo ababyibuka bazi neza ko hari abakinnyi bazaniwe Amavubi bavuye hanze, ariko hasabwe ubushishozi mu gukora amahitamo akwiye y’ukwiye guhabwa ubwenegihugu, agahabwa umutwaro wo kuduhagararira nubwo tudasangiye inkomoko.

Reka nigarukira kwa Carlos Alós turi kumwe uyu munsi wa none! Uyu mugabo na we yahawe uburenganzira busesuye bwo gushaka abakinnyi bazamufasha kongera kugeza u Rwanda mu ruhando rw’abagabo, bya bihugu navuze ruguru, bihanganira n’ibindi mu kibuga, twe tugasigara dushungerera kuri televiziyo.

Ubwisanzure uyu mugabo yahawe sinjya kure mu kubwerekana kuko akigera mu Amavubi yinyabije hakurya iyo muri Kazakhstan, aganiriza Rutahizamu ukomoka muri Côte d’Ivoire, Gérard Bi Goua Gohou, amusaba gukinira Amavubi. Na we ntiyazuyaje kuko yahise abyemera bwangu, ndetse amaze kuyakinira imikino itatu ya gicuti, atsindamo igitego kimwe.

Uyu mugabo wakiniraga FC Aktobe [mbere yo gusezererwa ku wa 17 Mutarama 2023], yakoranye n’Umutoza w’Amavubi, Carlos Alós Ferrer, mu 2017 ubwo bari mu Ikipe ya FC Kairat muri Kazakhstan.

Umunya-Côte d’Ivoire Gérard Bi Goua Gohou w'imyaka 33, aherutse kwinjizwa mu Amavubi

Amavubi yaba agiye kuba amasaziro y’abanyamahanga?

Kimwe mu bigezweho uyu munsi ni uburyo bwo guha amahirwe abakinnyi batandukanye bifuza gukinira u Rwanda nk’uko bikorwa no mu yindi mikino.

Nubwo bimeze bityo ariko, uburyo iyi gahunda yatangiye gushyirwa mu bikorwa bikomeje kuvugisha benshi kuko imbaraga zishyirwa mu basigaje igihe gito ngo basezere kuri ruhago.

Ingero za hafi ni Gérard Bi Goua Gohou w’imyaka 33. Uyu rutahizamu ashobora kwiyongeraho Rutahizamu Kevin Monnet-Paquet, u Rwanda rwinginze ngo arukinire ariko ubwo busabe akaburenza ingohe kuva mu myaka 12 ishize.

Carlos utoza Amavubi yacu yagiye guhura n’uyu mukinnyi wa Aris Limassol muri Chypre mu cyumweru gishize, atangaza ko bagiranye ibiganiro byiza biganisha ku kuba yafasha u Rwanda mu minsi iri imbere.

Hari inyungu wakumva mu gukinisha uyu rutahizamu ufite inkomoko mu Bufaransa nko kuba yaharurira amayira abandi bazakinira igihugu, ariko nanone hari ababibaza niba koko ari we ukwiye gutakazwaho ubushobozi n’umwanya ngo aze gucungura Amavubi yacu, amaze imyaka igera kuri 18 acumbagira, atarongera guha Abanyarwanda ibishimo byuzuye.

Yaba Gerard na Monnet-Paquet, biragoye gusubiza inyuma amahirwe nk’aya kuko kuri bo ni nko gutora zahabu mu gitaka kuko ku myaka yabo bigoye ko babona ibindi bihugu bibabenguka kuko ibyabo byo no kubitekereza ntaho byaba bitaniye na rya gereranya Bibiliya yakoze ivuga ku kwinjiza inzovu mu mwenge w’urushinge.

Ibaze aka kabazo, si ngombwa ko unsubiza. Kuki abakinnyi turambagiza bavuye hanze tubakirana umutima ukunze ariko abacu dusanganywe bari mu myaka yenda kungana n’iyabo, tukabafata nk’abasaza bagomba kumanika inkweto na "gants" bagasezera ruhago?

Umutoza w'Amavubi Carlos Alós-Ferrer aherutse kujya gusaba Kévin Monnet-Paquet ngo azakinire u Rwanda

Ni nde urambagiriza Ikipe y’Igihugu abakinnyi?

Urebesheje amaso y’umubiri, ubona ko hari imbaraga nyinshi zishyirwa mu gushaka abakinnyi batekerezwa nk’abakura Amavubi ku ngoyi yo gutsindwa imazeho iyo myaka.

Abakurikiranira hafi ibya ruhago bibaza impamvu izo mbaraga zidakoreshwa harambagizwa abakiri bato kandi bafite ubushake bwo gukinira Ikipe y’Igihugu.

Kugeza kuri ubu, hari amazina menshi atandukanye y’Abanyarwanda bakina hanze, amenshi muri yo anyotewe no gukina yambaye ubururu, icyatsi n’umuhondo ndetse n’andi muri yo yifuza kubanza kumenya gahunda ya FERWAFA n’abandi bareberera ruhago Nyarwanda.

Icyo kwishimira uyu munsi ni uburyo umutoza Carlos Alós-Ferrer amaze iminsi afata indege akajya gusura abakinnyi batandukanye b’Abanyarwanda, akareba uko bakina. Njye narabishimye. Ibi bitandukanye n’ibyabaye ku bandi batoza banyuze mu Amavubi nubwo na bo hari igihe binyabyaga bakagira uwo bajya kureba.

Mu gihe kitageze ku mwaka, Carlos amaze gusura abakinnyi batandukanye barimo Imanishimwe Emmanuel na Manzi Thierry [bahoze bakinana muri AS FAR] ndetse hari n’abandi yagiye asura.

Ibye ntibigoye kubibona, iyo abikoze ahita abisakaza ku mbuga nkoranyambaga ze, na we wanagayo akajisho, ukabibona.

Mu Ukwakira, uyu mutoza yasuye kandi Hakim Sahabo ku mukino Lille y’Abatarengeje imyaka 19 yahuyemo na PSG y’abatarengeje iyo myaka kuri Stade Municipal Georges Lefèvre (Saint-Germain-en-Laye).

Mu Ukwakira, Carlos utoza Amavubi yagiye kureba Hakim Sahabo aho akina mu Bufaransa

Intyoza mu kuvuga cyangwa umuyobozi mu rwego runaka, bakwiye guharirwa inshingano?

Mu bihe bitandukanye, iyo akenshi hahamagawe Amavubi agomba kwitegura imikino runaka, hagaragara impinduka nyinshi cyane mu bakinnyi bakina hanze. Usanga hari uwari witabajwe ubushize utongeye kugaruka ahanini kubera ko urwego rwe rutari ku rukenewe mu Ikipe y’Igihugu.

Kimwe mu bituma uku kwibeshya ku mukinnyi kubaho ni uburyo hari abahamagarwa umutoza atarabona bakina, hakazamo no gushaka kubatanguranwa n’ibindi bihugu.

Ikindi ni ukuba uyu munsi nta komite ihari izwi [akanama k’inzobere] ishinzwe gushakira abakinnyi Ikipe y’Igihugu ku buryo umuntu yakwizera urwego rw’abarambagijwe.

Aha kugira ngo ubyumve neza, uyu munsi Carlos niyumvisha Monnet-Paquet ko hari uburyo bakorana bagafasha u Rwanda kubona itike ya CAN 2023, amasezerano y’umwaka uyu mutoza yasinye ntiyongerwe nyuma ya Werurwe, ahazaza h’uyu mukinnyi mu Mavubi bizagenda gute? Ese azaba afite ikihe cyizere cy’uko uzamusimbura azamukinisha?

Hakwiye kubaho uburyo buhamye bwo gushakira Ikipe y’Igihugu abakinnyi, abatoza bagakurikirana imikinire n’urwego rwabo ku mikino itandukanye ariko atari bo bashingiweho mu kubumvisha ko baza gukinira u Rwanda.

Nta myaka ibiri ishize tubonye Bamporiki Edouard [uyu wahoze ari Umunyamabanga wa Leta muri Minisiteri y’Urubyiruko n’Umuco] yagiye guhura na Ngwabije Bryan Clovis akamusaba ngo azakinire u Rwanda.

Uyu myugariro wa Andrézieux-Bouthéon mu Cyiciro cya Kane mu Bufaransa, yarabyemeye ndetse nyuma y’amezi atanu, muri Kamena 2021, ahamagarwa mu Ikipe y’Igihugu yakinnye imikino ibiri ya gicuti na Centrafrique anitwara neza.

Gusa, kuri ubu ntawe ukimwibuka mu Ikipe y’Igihugu kubera ikosa rimwe ryavuyemo igitego Mali yatsinze u Rwanda mu gushaka itike ya CAN 2021, aho Umutoza Mashami Vincent atishimiye urwego rwe agahita amusimbuza ndetse ntiyongera no kumuhamagara ukundi kugeza ubwo Carlos ari we wamutekerezaga muri Nzeri 2022.

Uru ni urugero rumwe rwerekana ko kuba umuntu yaba ari intyoza mu gukurikiranya amagambo bitamuha uburenganzira busesuye bwo kurambagiriza Amavubi. Ni byo hari umusanzu yatanga ariko na none si we ukwiye kwikorezwa uwo mutwaro wo kujya kuguyaguya abakinnyi rimwe na rimwe ushobora no gusanga adafite ubumenyi bumubashisha gutanga ubusabe bukwiye.

Uyu reka tumuveho twigarukire muri ya nzu y’i Remera, ireberera inyungu za ruhago yacu.

Abayobozi bayo barimo Perezida wa FERWAFA, Umunyamabanga wayo hari intambwe na bo bagiye batera bajya gushaka abakinnyi babereye Amavubi yakwifashisha.

Ni byo ni abanyamupira ariko nanone si bo bakwiye guhangwa amaso nk’abashobora kuganisha igihugu mu cyerekezo nyacyo kandi kirambye.

Ibi ndabivuga kuko aba bagabo bafite manda batorerwa, abandi ni abakozi bafite amasezerano bagenderaho, ni ukuvuga ko bashobora kwegura, kuva ku kazi ku mpamvu zitandukanye nk’uburwayi, amakosa cyangwa se bakajya mu zindi nshingano. Ibyo byose birashoboka.

Muri icyo gihe rero, bishobora kubera umutwaro wa mukinnyi barambagije! Uyu usanga hari ibyo bamwemereye kuko hari abo twumva ngo bemererwa inzu zo kubamo, kubakira imiryango yabo, kuyiha imodoka zo kugendamo n’ibindi.

Aha ni ho hashobora kuvuka ibibazo aho usanga umukinnyi yikoza mu Amavubi ariko ntarambemo.

Abamuzi mwaba mwibuka irengero rya Rushenguziminega Quentin. Uyu rutahizamu w’ibigango ashobora kuba yaragize ibindi bibazo byatumye adakomeza kudukinira ariko uwabihuza n’ibyuho biri mu kurambagiza abakinnyi nta nka yaba aciye amabere.

Hari abicuza kuba barakiniye u Rwanda

Niba dushaka kugira ikipe y’Igihugu ikomeye, nitubanze duhe agaciro abambaye uyu mwambaro mbere yo gutekereza kuwambika abandi.

Uyu munsi hari abakinnyi babuze ayo bacira n’ayo bamira, babuze icyo bari cyo kubera ko bakiniye u Rwanda. Urugero ni bamwe mu bana bakinnye Igikombe cy’Isi cy’Abatarengeje imyaka 17 muri Mexique ariko batahawe ubwenegihugu ndetse na bamwe muri bakuru babo bajyanye u Rwanda muri CAN ya 2004.

Ibi bibazo byose si bishya muri ruhago y’Isi kuko ibindi bihugu nabyo byageze ku iterambere byabanje kunyura izo nzira z’amahwa, ibiganisha ku ntsinzi.

Nko ku cyo kurambagiza abakinnyi bakwiye kwambara umwambaro w’Amavubi kuki hadashyirwaho urwego rwihariye rurimo abakinnye umupira w’amaguru n’abandi bahagarariye inzego ku buryo mu gihe cyo guhitamo bahuza ibitekerezo biganisha ku nyungu rusange z’igihugu.

Ibi bizafasha gukemura za ntugunda zivuka mu kuba buri wese bitewe n’ijambo afite ashobora kurabukwa umukinnyi, akamuganiriza, akamurangira abandi, bugacya tumubona mu Ikipe y’Igihugu.

Ibikubiye muri iyi nkuru, ni ibitekerezo bwite by’umwanditsi

Bamporiki Edouard [wahoze ari Umunyamabanga wa Leta muri Minisiteri y’Urubyiruko n’Umuco] yagize uruhare mu kumvisha Ngwabije Bryan Clovis ko yakinira u Rwanda
Ibiganiro bya Bamporiki na Ngwabije byatanze umusaruro, uyu mukinnyi yemera gukinira Ikipe y'Igihugu mu 2021
Ubuyobobozi bwa Ferwafa nabwo ntiburi mu mwanya wo kwikorera umutwaro wo kurambagiriza Amavubi
Hakwiye uburyo buhamye mu kurambagiriza abakinnyi Amavubi, bitaba ibyo bizaba bimeze nko kuvomera mu rutete

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .