Ni irushanwa rigamije kwibutsa Abanyarwanda intego y’ikigega cy’Agaciro Development Fund no kongeramo umusanzu, umukino wa mbere wahuje AS Kigali yakiriye Rwamagana ku Mumena.
Wari umwanya mwiza ku mutoza wa AS Kigali, Nshimiyimana Eric kureba urwego abakinnyi be bagezeho bitegura shampiyona izatangira tariki ya 18 Nzeli 2015 nyuma y’ukwezi kw’imyitozo n’imikino ya gicuti.
AS Kigali yabonye igitego mu gice cya mbere cyitsinzwe na Djafari.
Iyi kipe y’Umujyi wa Kigali yaje kubona impamba y’igitego cya kabiri batsindiwe na Bariyanga Hamdan ku munota wa 52 mbere yo kujya i Rwamagana kuwa Mbere mu mukino wo kwishyura ku kibuga cya Polisi y’igihugu.
AS Kigali yashoboraga kubona igitego cya gatatu ariko penaliti yatewe na Tuyisenge Pekeyake uheruka gusinya imyaka ibiri avuye muri Vital’o y’i Burundi ifatwa neza n’umunyezamu wa Rwamagana wahoze ari muri AS Kigali.
Undi mukino wabereye mu mujyi wa Kigali, Police FC yatsinze Bugesera igitego 1-0 cya Mwemere Ngirinshuti.
Kuri uyu wa Mbere, APR FC izasura Bugesera i Nyamata mu mukino mu itsinda A ku makipe y’Iburasirazuba n’Umujyi wa Kigali.
Nubwo hategerejwe ko muri iyi mikino hazavamo umusanzu uvuye mu mafaranga y’abinjiye ku kibuga umubare w’abafana wari muke ku Mumena mu gihe ku gushishikariza Abanyarwanda no kubibutsa intego y’ikigega Agaciro Development Fund nta jambo na rimwe cyangwa icyapa byigeze bigaragara ku kibuga.
Indi mikino yabaye mu gice cy’Amajyaruguru n’Iburengerazuba, Marines yatsindiwe kuri Tam Tam na Musanze igitego 1-0 naho Gicumbi inganya ibitego 2-2 na Etincelles.
Imikino yo kwishyura irakinwa kuri uyu wa Mbere
Amakipe y’Iburasirazuba n’Umujyi wa Kigali
Itsinda B
Rwamagana vs AS Kigali i Rwamagana ku kibuga cya Polisi
Sunrise vs Kiyovu i Rwamagana
Amakipe yo mu burengerazuba n’Amajyaruguru
Musanze vs Marines i Musanze
Etincelles vs Gicumbi kuri Tam Tam
TANGA IGITEKEREZO