Ni umukino aba bafana bari bitabiriye ku bwinshi, bakoze urugendo rurerure rw’ibilometero 165 bafite icyizere ko bahakura impamba izatuma bakira Rutsiro FC ku munsi wa nyuma bizeye kuzamura Igikombe cya Shampiyona baheruka mu myaka 30.

Gusa si ko byaje kugenda kuko ku munota wa 70, Rutahizamu Yafesi Mubiru yatsinze igitego rukumbi cyagaragaye muri uyu mukino ku mupira yazamukanye mu ruhande rw’iburyo akareba uko umunyezamu Kimenyi Yves yegereye imbere akamurenza umupira inshundura zikanyeganyega.

Ku munota wa 74, Kiyovu Sports yari igiye kubona impozamarira kuri penaliti gusa Umunya-Uganda, Erisa Ssekisambu, ayitera hejuru y’izamu.

Ubwo Umusifuzi yahuhaga mu ifirimbi ko umukino urangiye; abayobozi, abakunzi n’abafana ba Kiyovu Sports bashenguwe n’agahinda nyuma yo gutakaza icyizere cyo kwegukana igikombe cya Shampiyona baherukaga mu myaka 30.

Perezida wa Kiyovu Sports Limited, Mvukiyehe Juvenal, yari yicaye agaragiwe na bamwe mu nshuti ze ababaye cyane nyuma yo guha Kiyovu Sports ibyo yari ikeneye byose ariko ku munota wa nyuma ikaba ishobora gusoza umwaka wa 2022-23 nta gikombe na kimwe yegukanye.

Perezida w’Umuryango wa Kiyovu Sports, Ndorimana Jean François Régis ‘General’, we yipfutse mu maso nyuma yo kubona ibyari bimaze kuba ku Ikipe ye.

Abafana bo basutse amarira kuri uyu munsi wari uw’agahinda mu gihe abakinnyi n’abafana ba Sunrise FC ku rundi ruhande bari mu birere bishimira intsinzi.

Kiyovu Sports izakira Rutsiro FC tariki 28 ku munsi wa 30 wa shampiyon ari nawo wa nyuma mu gihe APR FC yo izaba yakiriwe na Gorilla FC. Rayon Sports yo izasoreza i Nyagatare yakirwa na Sunrise FC.

Umwe mu bafana ba Kiyovu Sports yabanje gusenga mbere y'umukino benshi bari bafitiye icyizere ko uri bubegereze igikombe

Perezida wa Kiyovu Sports Limited, Mvukiyehe Juvenal yacungiraga hafi Ikipe ye buri uko yabaga ibonye uburyo imbere y'izamu

Mvukiyehe yatangiye kwinubira imikinire y'Ikipe ye mu gice cya mbere

Umunyamakuru , Kavungu Claver, ari muri benshi batanyuzwe n'imikinire ya Kiyovu Sports

Yabonaga yari kuba yatsinze uyu mukino

Sunrise FC yakinnye uko benshi mu Bayovu batabikekaga

Iyo Kiyovu Sports yahushaga uburyo imbere y'izamu, benshi bifataga ku munwa

Perezida w'icyubahiro wa Kiyovu Sports, Makuza Bernard na we yarebye uyu mukino

Yagiye agaragara kenshi atanga ibitekerezo by'ibyari bikwiye gukosoka

Abatoza na Team Manager nabo ku ntebe bunguranaga ibitekerezo by'igikwiye gukorwa

Sunrise FC yabonye igitego ku munota wa 70 gitsinzwe na rutahizamu ukomoka muri Uganda, Yafffesi Mubiru

Ubusatirizi bwari buyobowe na Mubiru n'Umunya-Nigeria, Babuwa Samson bwahaye akazi gakomeye Kiyovu Sports

Nyuma y'iminota ine gusa Sunrise itsinze igitego, Kiyovu Spirts yabonye penaliti yatewe hejuru na rutahizamu ukomoka muri Uganda, Erisa Ssekisambu

Umupira watewe na Ssekisambu wagiye hejuru y'izamu

Kari agahinda kuri uyu rutahizamu wari gutsinda igitego cyari kugarura Kiyovu Sports mu mukino

Abatoza ba Kiyovu Sports barimo uwongera imbaraga Dabo Seydou na Andre Landeut bari bashenguwe n'agahinda nyuma y'umukino

Abakinnyi ba Kiyovu Sports bari bahangayikishijwe n'uko umukino wagendaga nyamara bamaze kwinjizwa igitego

Rutahizamu Iradukunda Bertrand na Myugariro Benedata Janvier nta byishimo bari bafite ku maso

Abakinnyi ba Sunrise FC batinzaga iminota kenshi kuko bari bafite impamba y'igitego

Abakinnyi ba Kiyovu Sports bihutiraga kugarura umupira mu gihe cyose warengaga

Umutoza mukuru wa Kiyovu Sports, Mateso Jean de Dieu, yitegura gufata umupira wari umaze kurenga ngo awusubize Ikipe ye kuko yari ifite umwenda w'igitego

Nyuma y'umukino, Umutoza w'abanyezamu ba Kiyovu Sports yipfutse isengeri mu maso kubera gushengurwa n'agahinda

Ku rundi ruhande abakinnyi n'abatoza ba Sunrise FC bateruye Rutahizamu Yafeesi Mubiru wabatsindiye igitego

Byari ibyishimo kuri iyi kipe yo mu Burasirazuba

Abakinnyi ba Kiyovu Sports bashenguwe n'agahinda nyuma yo gutakaza uyu mukino

Baryamye mu kibuga babura imbaraga zihaguruka

Rutahizamu Iradukunda Bertrand yasohotse mu kibuga atwawe mu maboko kubera agahinda

Myugariro Nsabimana Aimable wari wacitse intege yakuyemo umupira awuterera ku bitugu

Kapiteni akaba n'Umunyezamu wa Kiyovu Sports, Kimenyi Yves watsinzwe igitego ntiyumvaga ibimaze kubabaho

Rutahizamu Erisa Ssekisambu wahushije penaliti, yashenguwe n'agahinda ajya mu rwambariro bamurandase

Yasutse amarira menshi

Uwambazimbana Leon 'Kawunga' utagaragaye muri uyu mukino, yaje kwishimana na bagenzi be nyuma yo guhigika Kiyovu Sports

Abayobozi ba Kiyovu Sports bashenguwe no gutsindwa na Sunrise FC yababujije amahirwe yo kwegukana igikombe cya Shampiyona

Perezida w'Umuryango wa Kiyovu Sports, Ndorimana Jean François Regis 'General', yagaragaye yipfutse mu maso nyuma yo kwinjizwa igitego

Perezida w'icyubahiro wa Kiyovu Sports, Makuza Bernard ubwo yasohokaga muri Stade nyuma y'umukino

Nyuma y'umukino Perezida wa Kiyovu Sports Limited, Mvukiyehe Juvenal yashenguwe n'agahinda ava mu ntebe aramanuka yicara ku ngazi za Stade ya Nyagatare atumva ibimaze kuba ku Ikipe ye

Yari agaragiwe na bamwe mu nshuti ze ndetse bakaba n'abakunzi ba Kiyivu Sports

Mvukiyehe yari afite agahinda kenshi

Nyuma y'akanya gato yicaye, yasohotse muri Stade ya Nyagatare

Ni umunsi wari uw'agahinda ku Bayovu

Uyu yisunze icyuma cy'amashanyarazi ngo kimufashe guhagarara

Abagabo bariraga nk'abana

Uyu byabaye ngombwa ko bamuhoza

Yari amarira ku Ikipe yari iri guhatanira ibikombe bibiri ikaza kubivamo mu cyumweru kimwe gusa

Thierry umwe mu bakunzi b'imena ba Kiyovu Sports yasohotse yubitse umutwe mu modoka yatashyemo na Perezida wa Kiyovu Sports Limited, Mvukiyehe Juvenal

Mu gihe abafana batahaga, Umutoza mukuru wa Kiyovu Sports, Mateso Jean de Dieu yagiye kuri telefoni atanga ubutumwa bw'ibimaze kubabaho

N'agahinda, abakinnyi ba Kiyovu Sports binjiye mu modoka umwe ku wundi

Nyuma y'umukino Manager wa Kiyovu Sports, Andre Landeut yahanye nimero na Rutahizamu wa Sunrise FC, Babuwa Samson witwaye neza muri uyu mukino

Amafoto: Ntare Julius}}