00:00:00 IGIHE NETWORK KN KINYARWANDA EN ENGLISH FR FRANCAIS

Abasifuzi b’Abanyarwanda bambuwe umukino bari gusifura i Kinshasa

Yanditswe na Byiringiro Osée Elvis
Kuya 5 June 2024 saa 10:18
Yasuwe :

Abasifuzi mpuzamahanga b’Abanyarwanda; Uwikunda Samuel, Mutuyimana Dieudonné, Ishimwe Didier na Twagirumukiza Abdoul Karim bambuwe kuzasifura umukino uzabera muri RDC ukazahuza Congo Brazzaville na Maroc.

Amakipe y’ibihugu muri Afurika akomeje guhatana mu majonjora y’ibanze yo gushaka itike y’Igikombe cy’Isi cya 2026 kizabera muri Leta Zunze Ubumwe za Amerika, Canada na Mexique.

Icyakora bimwe muri ibi buhugu bikomeje kugira ikibazo cy’ibibuga bitujuje ibisabwa n’Ishyirahamwe rya Ruhago ku Isi (FIFA), biba ngombwa ko bishaka aho byakirira imikino yabyo.

Ni muri urwo rwego Congo Brazzaville yahise yegera abaturanyi bayo ba Repubulika Iharanira Demokarasi ya Congo bayitiza ikibuga igomba kwakiriraho umukino uzayihuza na Maroc tariki 11 Kamena 2024.

Kujyana uyu mukino muri RDC niyo ntandaro yo kuwambura aba basifuzi kubera umwuka mubi uri hagati y’ibihugu byombi, aho RDC ishinja u Rwanda gufasha umutwe wa M23, ibirego ruhakana rwivuye inyuma.

Uyu mukino wahise uhabwa abasifuzi b’abanye-Ghana aho uzayoborwa na Laryea Daniel.

Kugeza ubu Maroc iyoboye Itsinda E aho imaze gukina umukino umwe mu gihe Congo Brazzaville ari iya gatanu. Andi makipe biri kumwe ni Zambia, Niger, Tanzania na Eritrea.

Uwikunda Samuel yari kuzayobora uyu mukino hagati mu kibuga
Twagirumukiza Abdoul Karim yari umusifuzi wa kane ku mukino wa Congo na Maroc

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .