00:00:00 IGIHE NETWORK KN KINYARWANDA EN ENGLISH FR FRANCAIS

Abakinnyi b’abanyamahanga ntacyo batumariye - Umutoza Julien Mette wa Rayon Sports

Yanditswe na Iradukunda Olivier
Kuya 10 June 2024 saa 04:40
Yasuwe :

Ubuyobozi bwa Rayon Sports buri gufatanya n’Umutoza wayo Julien Mette mu gushakisha impano za bamwe mu bakinnyi bashya bazayifasha mu mwaka utaha w’imikino.

Ni impano ziganjemo abakinnyi bakinaga mu Cyiciro cya Kabiri mu Rwanda ndetse na bamwe mu bakinnyi b’Ikipe ya Rayon Sports y’abatarengeje imyaka 20.

Umufaransa Julien Mette uri mu Rwanda araiko nawe akaba atarongererwa amasezerano yavuye imuzi impamvu yo gushaka aba bakinnyi ndetse n’ejo hazaza he muri Rayon Sports.

Mu kiganiro cy’Ikipe ya Rayon Sports ‘Rayon Time’ yavuze habaye umukino hagati y’abakinnyi b’imyaka 17 na 24 mbese bafite ku mpuzandengo y’imyaka 19 bakuwe mu Cyiciro cya Kabiri bongewemo abasanzwe mu Ikipe y’Abatarengeje imyaka 20.

Asobanura uko yabonye impano zabo yagize ati “Aba nibo twatekerezaga ko bari bashoboye, bari abakinnyi batari baziranye kuko batamenyeranye. Ndi gushakira abakinnyi Ikipe ya Rayon Sports bafite ubushobozi bwo kuyifasha. Aba si abakinnyi bakomeye bo kuyiheka keretse habayemo gutungurana.”

Yongeyeho ko abakinnyi ari gushaka ari abakwemera kwicara ku ntebe y’abasimbura bakajya bahabwa byibuze iminota 10 cyangwa 20, baba bari mu bihe byiza bakaba banabanzamo.

Yashimangiye ko iki gikorwa kiri kuba ku mpamvu z’uko abakinnyi benshi mu mwaka ushize batengushye ikipe mu bihe bitandukanye cyane cyane abanyamahanga.

Ati “Mu mwaka ushize twari dufite abakinnyi b’abanyamahanga batigeze batubanira, abenshi muri bo ntibatanze umusaruro, ntibafashije ikipe haba mu buryo bw’imikinire, imibanire ndetse n’ibindi, urebye muri abanyamahanga ntacyo batumariye.”

“Nta munyamahanga wicara ku ntebe. Mu mezi ane maze hano, hari abakinnyi bavugaga ngo baricaye ariko bari kubona amafaranga yabo. Dufite guhindura iyo myumvire.”

Yongeyeho ko abakinnyi b’abasimbura nabo batigeze babanira ikipe uretse Iradukunda Pascal, Arsène Tuyisenge na Kanamugire Roger. Abandi ntibamufashije na gato.

Avuga ku masezerano mashya muri Rayon Sports, yavuze ko yamaze kugirana nayo ibiganiro gusa ntubwo atarasinyira kuba yayigumamu bidakuraho ko agomba gukomeza gukora akazi.

Ati “Twaravuganye ariko njye ndi umunyamwuga, nagumye hano ngo nsoze amasezerano yanjye. Hano hari akazi kenshi ko gukora, ndi gufasha ikipe gutegura umwaka utaha w’imikino harimo gutoranya uhaguma cyangwa ugenda. Kuguma hano ntacyo bintwaye ariko binabaye ngombwa ko njyenda.”

“Turishimiranye, umwaka utaha ndamutse ntahari zaba ari impamvu ebyiri, iya mbere ni ikipe nini kurusha iya mbere cyangwa se ikipe itabasha kwishyura umushahara mfata. Kuri iyi nshuro bazagure abakinnyi b’abanyamahanga beza. Naberetse abakinnyi nka babiri cyangwa batatu bashobora kuzaza hano. Ikibazo wenda gishobora kuzaba ubushobozi kandi nanjye ibyo birandeba nk’umutoza.”

Rayon Sports yarangije umwaka wa 20023-24 iri ku mwanya wa kabiri muri Shampiyona ndetse inatwara umwanya wa gatatu mu gikombe cy’Amahoro.

Kugeza ubu isigaranye abakinnyi batandatu bonyine bafite amasezerano.

Julien Mette utoza Rayon Sports ari kuyishakira abakinnyi mu Cyiciro cya Kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .