Imwe muri shampiyona zari zitegerejwe ni iyo mu Bwongereza, yatangiye ku wa Gatanu, tariki ya 21 Kanama 2026, umukino wa mbere uhuza Arsenal yegukanye Igikombe cya Shampiyona cya 2025/26, na Coventry City Football Club yazamutse mu Cyiciro cya Mbere.

Ni umukino Arsenal yakuyeho intsinzi y’ibitego 3-0, ibifashijwemo na Kai Havertz winjije igitego cya mbere muri iyi shampiyona, Bukayo Saka na Martin Ødegaard.

Mu mikino yakurikiyeho ku wa Gatandatu, Manchester United FC yatunguwe na Hull City nshya muri uyu mwaka kuko ari bwo yari ikiva mu Cyiciro cya Kabiri, iyitsinda ibitego 2-0.

Umwaka w’imikino kuri Manchester United watangiye nabi, dore ko mu mateka yayo ari bwo bwa mbere itakaje umukino ufungura shampiyona, yakinnye n’ikipe ikizamuka, kuko iheruka 13 yatsinzemo 10 ikanganya itatu.

Usibye Hull City yabonye amanota atatu, Ipswich Town na yo yazamutse yatsinze Sunderland ibitego 2-1, ku nshuro ya kane mu mateka amakipe abiri mu yazamutse muri Shampiyona y’u Bwongereza abona amanota atatu.

Byanabaye mu 1997/98 hatsinda Bolton na Crystal Palace, mu 2021/22 hatsinda Brentford na Watford, no mu mwaka ushize wa 2025/26 ubwo hatsindaga Leeds na Sunderland.

Indi mikino ni Liverpool yanganyije na Newcastle United ibitego 2-2, Manchester City itangira neza itsinda Bournemouth ibitego 2-1, mu gihe Chelsea yikiranura na Fulham kuri uyu wa Mbere, tariki ya 24 Kanama.

Ikipe yatangiye iyoboye izindi ni Brighton & Hove Albion yanyagiye Aston Villa ibitego 4-0, bituma inatangirira ku mwanya wa nyuma. Jack Hinshelwood winjije ibitego bibiri yahise atangira ayoboye abafite byinshi.

Arsenal yatangiye neza umwaka w'imikino wa Shampiyona y'u Bwongereza

Shampiyona ya Espagne

Shampiyona ya Espagne ‘La Liga’ iri mu ntangiriro, gusa hari amakipe yakinnye umukino wa mbere muri uyu mwaka w’imikino wa 2026/27, hakaba n’andi yakinnye umukino w’umunsi wa kabiri.

Real Madrid na FC Barcelone nk’amakipe ahanganye muri iyi shampiyona, ntabwo yakinnye umunsi wa mbere kuko yagizweho ingaruka zo kugira abakinnyi benshi bari mu Gikombe cy’Isi cya 2026, bahabwa umwanya uhagije wo kwitegura shampiyona, uyu munsi ugirwa ikirarane kuri aya makipe.

Kuri Real Madrid uyu mukino ugomba kuyihuza na Real Sociedad wimuriwe ku wa Gatatu, tariki ya 26 Kanama, mu gihe uwa FC Barcelone na Athletic Bilbao wimuriwe ku wa Kane, tariki ya 27 Kanama 2026.

Gusubika iyi mikino ntibyari bivuze kudatangira umwaka kuri aya makipe, dore ko mu mpera z’icyumweru gishize yakinnye umunsi wa kabiri nk’uko byagenze ku yandi makipe.

Real Madrid itozwa na José Mourinho yatsinze umukino wayihuje na Espagnol, ku bitego 2-1. Usibye igitego cya Jude Bellingham, na Carlos Espí waguzwe mu isoko ry’abakinnyi riheruka yatsinze igitego cy’intsinzi.

FC Barcelone na yo yitwaye neza, inyagira Elche ibitego 5-0 mu mukino wayo wa mbere. Aha harimo ibitego bibiri bya Raphinha na bibiri bya Fermín López na kimwe cya Karim Adeyemi mushya mu ikipe.

Ikipe yatangiye umwaka wa 2026/27 iyoboye ni Sevilla y’amanota atandatu, kuko Atletico Madrid yirangayeho inganya na Villareal igitego 1-0, mu mukino wakinwe ku Cyumweru.

Mu minsi ibiri imaze gukinwa muri iyi shampiyona, abakinnyi bane bamaze kwerekwa amakarita atukura. Abo ni Kiko Femenia wa Getafe, Kike Salas wa Sevilla, Yuri Berchiche wa Athletic Bilbao na Robin Le Normand wa Atletico Madrid.

Abakinnyi bane bayoboye abafite ibitego byinshi aho binjije bibiri. Abo ni Raphinha na Fermín López ba FC Barcelone, Mariano Díaz wa Deportivo Alavés na Roberto Fernández wa Espanyol.

FC Barcelone yanyagiye Elche ibitego 5-0

Shampiyona y’u Bufaransa

Shampiyona y’u Bufaransa na yo yatangiye gukinwa mu mpera z’icyumweru, ariko Paris Saint-Germain yegukanye igikombe giheruka itangira inganya na Rennes ibitego 2-2 mu mukino wakinwe ku Cyumweru.

Ferran Torres wari umaze icyumweru kimwe aguzwe n’iyi kipe y’i Paris, ni we winjije ibitego byombi, ahita ajya ku rutonde rw’abatsinze byinshi ahuriyeho na Amine Gouiri wa Marseille na Florian Thauvin wa Lens.

Ikipe ya Marseille ni yo yinjiye mu mwaka neza kuko yanyagiye Strasbourg ibitego 4-0, mu mukino wabimburiye indi muri iri rushanwa.

Ferran Torres yatsinze ibitego bibiri bya Paris Saint-Germain ku mukino we wa mbere

Shampiyona y’u Butaliyani

Inter Milan yatangiye neza Shampiyona y’u Butaliyani ya Serie A, aho yatsinze Monza ibitego 4-1, ari na yo kipe yatsinze ibitego byinshi kuri uyu munsi wa mbere.

Andi makipe yatsinze harimo Juventus yatsinze Frosinone igitego 1-0, Napoli yatsinze Genoa ibitego 2-0, na AC Milan yatsinze Torino ibitego 2-1.

Usibye Udinese na Como byanganyije igitego 1-1, indi mikino yose yakinwe ku munsi wa mbere yabonetseho amanota atatu.

Amakipe ane ni yo asigaje gukina umunsi wa mbere, ari yo Bologna ikina na Lazio, ndetse na AS Roma ikina na Fiorentina. Imikino yombi iteganyijwe kuri uyu wa Mbere.

Inter Milan ni yo yatangiye iyoboye Shampiyona y'u Butaliyani

Shampiyona y’u Budage

Muri shampiyona zikomeye i Burayi, iyo mu Budage ni yo itaratangira, dore ko iteganyijwe mu mpera z’iki Cyumweru, kuva ku wa Gatanu, tariki ya 28 Knama, aho FC Bayern Munich izahera kuri Stuttgart.

Borussia Dortmund izakina na Hamburger SV, Bayer Leverkusen itangire ikina na Elversberg, mu gihe RB Leipzig izakina na Borussia Mönchengladbach.

Shampiyona y'u Budage izatangira muri izi mpera z'icyumweru