Eritrea yongeye gukina imikino yo gushaka itike y’Igikombe cya Afurika muri Werurwe uyu mwaka, nyuma y’imyaka 19 itayikina, ndetse yabonye itike yo kuzakina amatsinda yo gushaka itike ya CAN 2027 isezereye Eswatini ku bitego 4-1.

Gusa nyuma y’umukino wo kwishyura wabereye i Lobamba muri Eswatini, abakinnyi barindwi baburiwe irengero ubwo bari bageze muri Afurika y’Epfo.

Abakinnyi 10 bakina imbere muri Eritrea ni bo bari bahamagawe n’umutoza Hesham Yakan, ariko abasubiye mu rugo ni batatu gusa ari bo Ablelom Teklezgi, Nahom Tadese na Romel Abdu.

Itoroka ry’aba bakinnyi b’Abanya-Eritrea ntiritangaje, cyane ko atari bishya kuri iki gihugu.

Imikino ibiri Eritrea yahuyemo na Eswatini yari iya mbere mpuzamahanga ikinnye kuva itsinzwe na Sudani mu mukino wa gicuti wabaye muri Mutarama 2020.

Eritrea ntiyigeze yongera gukina umukino mpuzamahanga nyuma yo kwikura mu majonjora yo gushaka itike y’Igikombe cy’Isi n’Igikombe cya Afurika kubera abakinnyi benshi batorokaga bagiye mu mahanga.

Iki gihugu kiyoborwa na Perezida Isaias Afwerki kuva kibonye ubwigenge kigobotoye Ethiopia mu 1993. Amatsinda aharanira uburenganzira bwa muntu agaragaza ko uyu mugabo ayoborana ikandamiza, ari na byo bituma benshi mu bakinnyi batoroka.

Abakinnyi n’abandi bagize ikipe y’igihugu banze gusubira muri Eritrea nyuma y’imikino cyangwa amarushanwa atandukanye. Hari muri Angola mu 2007, Kenya mu 2009, Tanzania mu 2011, Uganda mu 2012, Botswana mu 2015, ndetse na none muri Uganda mu 2019.

Hagereranywa ko abakinnyi 80 b’umupira w’amaguru ari bo banze gusubira iwabo bagiye gukina hanze, ndetse bose bahise bareka gukina baba mu buhunzi.

Eritrea ntiyongeye kwemerera amakipe gusohoka igihugu kuva abagize ikipe y’abatarengeje imyaka 20 bahungira muri Uganda mu 2019.

Abakinnyi barindwi mu 10 bakina muri Eritrea bari bahamagawe mu ikipe y'igihugu, batorokeye muri Afurika y'Epfo