Abanyeshuri biga mu ishuri rikuru ry’ubuhinzi n’ubworozi, ISAE-Busogo, baravuga ko ibikoresho byabo byari mu macumbi mbere yo kujya mu biruhuko babibuze, mu gihe ayo mazu ari yo yabagamo abakinnyi ba Musanze bari mu mwiherero kuva tariki ya 20 Nyakanga 2013.

Bamwe mu banyeshuri bo muri ISAE-Busogo baganiriye na IGIHE, barara mu icumbi ryitwa D4, bavuga ko ibikoresho bari basize mu macumbi basanze ntabirimo, ingufuri z’utubati barazishe.

Uwitwa Muhire yavuze ko ayo mazu ari yo yabagamo abakinnyi ba Musanze bari mu mwiherero. Yagize ati “Si ubwa mbere kuko ni umwaka ushize, mu macumbi abakinnyi babagamo, abanyeshuri babuze ibintu bari barasizemo. Twabuze ibikoresho nk’amashuka, imyenda, inkweto n’ibindi ku buryo ubuzima hano butugoye.”

Aba banyeshuri barasaba ubuyobozi bw’Akarere ka Musanze gukurikirana iki kibazo, wenda bagasubizwa ibyo babauze.

Umuyobozi w’Ishyirahamwe ry’abanyeshuri biga muri ISAE-Busogo, Kanamugire Fidele, avuga iki kibazo yakimenye kuri uyu wa Kane, kandi ko atashidikanya ko ibikoresho by’abanyeshuri byajyanwe n’aba bakinnyi.

Kanamugire yagize ati “Nta bantu babaga mu kigo, kandi ibintu byabuze aho abakinnyi babaga, ingufuri z’utubati barazishe.”

Ubuyobozi bw’abanyeshuri bugiye kuvugana n’akarere kandi bizeye ko igisubizo kizaboneka vuba, bakabona ibyo babuze.

Umunyamabanga wa Musanze FC, Masumbuko Musa yabwiye IGIHE ko ari ubwa mbere, gusa akavuga ko niba hari abakekwa hagomba gukorwa iperereza.

Masumbuko yagize ati “Mbere yo kujya muri ayo macumbi habaye ubwumvikane hagati y’ubuyobozi bwa Musanze FC n’ikigo, kugeza ubu ntibaratubwira ko hari ikibazo cyaba cyarabaye.”

Masumbuko kandi yibaza impamvu ikibazo kigiye ahagararagara hashize ukwezi bavuye muri ayo macumbi.

Musanze FC yakoreye umwiherero mu Byangabo ariko bakaba mu macumbi asanzwe abamo abanyeshuri ba ISAE-Busogo. Ku munsi wa mbere wa shampiyona, Musanze FC izacakirana na Kiyovu Sport kuri sitade Ubworoherane, tariki ya 28 Nzeri 2013.

[email protected]