00:00:00 IGIHE NETWORK KN KINYARWANDA EN ENGLISH FR FRANCAIS

Abafana ba Kiyovu Sports biseguye kuri Mukansanga Salima

Yanditswe na Iradukunda Olivier
Kuya 23 Mutarama 2023 saa 11:52
Yasuwe :

Abafana ba Kiyovu Sports basabye imbabazi Ishyirahamwe rya Ruhago mu Rwanda, Abanyarwanda muri rusange na Mukansanga Salima by’umwihariko, ku bwo kugaragaza imyitwarire mibi ku mukino ikipe yabo yanganyijemo na Gasogi United.

Uyu mukino wabaye ku wa Gatanu, tariki ya 20 Mutarama 2023, aho Gasogi United yari yakiriye Kiyovu Sports kuri Stade ya Bugesera, amakipe yombi akanganya 0-0.

Umusifuzi Mpuzamahanga Mukansanga Salima ni we wayoboye uyu mukino. Bimwe mu byemezo yagiye afata ntibyavuzweho rumwe n’abafana ba Kiyovu Sports ari na ho mu mukino hagati batangiye kumuhata ibitutsi mu ndirimbo bagira bati "Urashaje, Urashaje.’’

Nyuma y’umukino ubwo Mukansanga yaganaga mu rwambariro yanyuze ku bafana ba Kiyovu Sports batangiye kuririmba mu ndirimbo zuzuye ibitutsi bagira bati "Malaya, Malaya, Malaya.’’

Ubwo Mukansanga yari arenze uruzitiro rw’ikibuga cya Stade ya Bugesera, umwe mu bafana yamanutse agana hasi asa n’ushaka kumusagarira ariko abashinzwe umutekano baramufata, bamubuza kumugeraho.

Nyuma y’ibi bikorwa bitashimishije ubuyobozi bw’iyi Kipe y’i Nyamirambo, Perezida wa Kiyovu Sports Ltd, Mvukiyehe Juvénal, yatangaje ko bitandukanyije n’abafana bagaragayeho ibikorwa by’imyitwarire mibi kuri uyu mukino.

Nubwo atavuga rumwe n’ibyo bakoze ariko na bo bahise bandika ibaruwa ifunguye, igenewe abakunzi b’umupira w’amaguru yanditswe na Minani Hemedi uhagarariye abakunzi ba Kiyovu Sports mu Rwanda.

Ubutumwa buri muri iyi baruwa bugaragaza ko nyuma yo kubona ibyabaye, abafana bahise bakora inama y’igitaraganya yo kwiga ku ngingo imwe rukumbi ishingiye ku myitwarire.

Ikomeza igaragaza ko ibyakozwe n’abafana bidakwiriye kubagaragaraho kuko n’indangagaciro zabo zitabyemera.

Iti “Nyuma y’uko dusanze hari imyitwarire igayitse yaranze bamwe mu bafana ba Kiyovu Sports bitwaje kutanyurwa n’imisifurire, bakibasira umusifuzi Mukansanga Salima, bamukomera ndetse harimo n’ibitutsi, twemeje ko twamaganye ku mugaragaro iyo myitwarire.”

Bagaragaje ko ibikorwa bakoze bitazongera kuko byizweho ndetse bigasesengurwa n’ama-fun clubs yose.

Amategeko ya Ferwafa ateganya ko abafana b’ikipe runaka baramutse bagaragaweho imyitwarire mibi muri rusange, ishobora guhanishwa kwakira imikino yayo nta bari ku kibuga.

Abafana ba Kiyovu Sports basabye imbabazi Mukansanga Salima
Abafana ba Kiyovu Sports bikomye Mukansanga Salima ku mukino wa Gasogi United FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .