Rayon Sports ikomeje gukoresha igerageza Umunya-Zanzibar, Raymond Lolendi Ntaudyimara, Umunye-Congo, Ntamba Musikwabo Malick ndetse n’Umunya-Cameroun, Assa Inah Innocent.

Ni imyitozo ya mbere kuri uyu Munya-Cameroun wageze mu Rwanda mu ijoro ryo ku wa Gatatu.

Yitabiriwe na Perezida Twagirayezu Thaddée, ndetse n’abafana bari mu rugero.

Bamwe mu bafana baganiriye na IGIHE, bagaragaje ko bafitiye icyizere aba bakinnyi cyane ko babonye bafite umupira ku kaguru nubwo bamwe badaheruka gukina.

Uwitwa Mucyo yavuze ko yabonye Assana Innocent azafasha cyane.

Ati “ Nabonye Assana afite umubiri w’abakina baca ku mpande. Ukurikije uko ameze atandukanye n’abo twari dusanganywe.”

Augustin yavuze ko yabonye abakinnyi bose bahagaze neza kandi bazi umupira.

Ati “Ikigaragara Assana afite umupira ku kirenge, abandi na bo urabona bazi gukina ariko wenda badaheruka gukina.”

Biteganyijwe ko Rayon Sports izakira undi rutahizamu ku Cyumweru, gusa we ntabwo azakora igeragezwa.

Gikundiro ikomeje kwitegura Igikombe cy’Intwari, aho umukino wa mbere izakina na Police FC ku wa Kabiri, tariki ya 28 Mutarama 2025 saa 18:00.

Iyi kipe kandi yasoje imikino ibanza iyoboye urutonde rwa shampiyona n’amanota 36 irusha atanu APR FC ya kabiri.

Umunya-Cameroun, Assa Inah Innocent yakoze imyitozo ya mbere muri Rayon Sports

Perezida wa Rayon Sports, Twagirayezu Thaddée yakurikiye iyi myitozo

Raymond Lolendi ni umwe mu bari gukora igerageza muri Rayon Sports

Assana Innocent ahanganye na Ndayishimiye Richard

Ku rundi ruhande, abanyezamu n'abo baba bari mu myitozo ikarishye

Adama Bagayogo ni umwe mu bakinnyi batsinda ibitego byinshi mu myitozo

Kapiteni Muhire Kevin yakoreye hanze y'ikibuga kubera imvune amaranye iminsi

Abafana bari babukereye bagiye kwihera ijisho abakinnyi bari mu igerageza

Amafoto: Kwizera Remy Moses
Video: Byiringiro Innocent