00:00:00 IGIHE NETWORK KN KINYARWANDA EN ENGLISH FR FRANCAIS

Aba-GP begukanye Irushanwa ryo #Kwibohora29 batsinze Task Force Division (Amafoto & Video)

Yanditswe na Byiringiro Osée Elvis
Kuya 3 July 2023 saa 10:22
Yasuwe :

Ikipe y’Abasirikare barinda abayobozi bakuru b’Igihugu (Republican Guard) yatsinze Task Force Division igitego 1-0 yegukana Irushanwa ryo Kwibohora “Liberation Cup Tournament” ryakinwaga ku nshuro ya mbere.

Uyu mukino wabereye kuri Kigali Pelé Stadium kuri uyu wa Mbere, tariki ya 3 Nyakanga 2023. Witabiriwe n’abafana benshi bari muri stade ku kigero nk’icya 80%.

Republican Guard yageze ku mukino wa nyuma itsinze ikipe y’Abasirikare bo mu Mutwe Udasanzwe, Special Operations Force ibitego 2-0 muri ½. Task Force Divison yo yatsinze BMTC Nasho igitego 1-0.

Uyu mukino watangijwe n’abayobozi bakuru bawitabiriye barimo Minisitiri w’Ingabo, Juvenal Marizamunda; Umugaba Mukuru w’Ingabo z’u Rwanda, Lt Gen Mubarakh Muganga; Umujyanama wa Perezida wa Repubulika mu by’Umutekano, Gen James Kabarebe na Minisitiri wa Siporo, Munyangaju Aurore Mimosa.

Ikipe ya Task Force yatangiye umukino isatira cyane kuko mu minota itanu ya mbere yari imaze kugerageza uburyo butatu bw’ibitego imbere y’izamu, ariko ntiyabubyaza umusaruro.

Ku munota wa munani, iyi kipe yazamutse neza cyane ariko ku bw’amahirwe make umupira ufata umutambiko w’izamu, Aba-GP batangira kugira icyikango.

Aba-GP batangiye kwinjira mu mukino mu minota 25 ari nako bahushaga uburyo bukomeye bw’ibitego binyuze kuri Bizimana Théoneste.

Mu minota 30, umukino watangiye gukinirwa hagati mu kibuga ndetse impande zombi zahushaga imipira yakinirwaga hagati.

Ku munota wa 36, Aba-GP bazamukanye umupira neza cyane bihuta bawucomekera Bizimana Théoneste uzwi nka Majidi atsinda igitego cya mbere benshi bakeka ko yaraririye ariko umusifuzi aracyemeza. Iminota 45 ibanza yarangiye Republican Guard yatsinze Task Force Division igitego 1-0.

Task Force yatangiye igice cya kabiri uko yatangiye icya mbere kuko yasatiraga cyane ndetse ihusha uburyo bwinshi bw’ibitego. Ni mu gihe Republican Guard yo yageragezaga kubona uburyo bukomeye ariko kuboneza mu rushundura bikanga.

Iki gice umuvuduko umukino wagenderagaho wagabanutse n’uburyo bw’ibitego bwaremwaga ku mpande zombi buba buke cyane byatumye kitaryoha nk’icya mbere.

Mu rusange uyu mukino mu kibuga wihariwe na Task Force Division mu gihe Aba-GP bakina ibikenewe nk’abantu bakuru ndetse bakagera ku musaruro.

Umukino warangiye Republican Guard yatsinze Task Force Division igitego 1-0 yegukanye Irushanwa ryo Kwibohora ryakinwaga bwa mbere.

Mu ijambo yagejeje ku bitabiriye iyi mikino, Minisitiri w’Ingabo, Juvenal Marizamunda, yavuze ko aya marushanwa ategurwa mu rwego rwo gutoza ingabo guhorana ishyaka ryo gukotana.

Yagize ati “Aya marushanwa tuyakora mu rwego rwo kwizihiza Ingabo zabohoye Igihugu. Umuco wo kurushanwa si mushya mu Ngabo z’u Rwanda kuko no mu 1990 mu rugamba rwo kukibohora yarabaye ndetse agera ku nshingano zayo.”

Marizamunda yakomeje ati “Muri rusange aya marushanwa agamije gusabana n’abandi, guhorana ishyaka ryo gukotana ndetse no kwimakaza umuco wo gukora Siporo. Guharanira intsinzi ni indangagaciro ikwiye guhora iranga Ingabo z’u Rwanda.”

Ikipe y’Ishuri rya Gisirikare riherereye i Gako yihariye ibikombe mu mikino y’intoki aho yegukanye ibyo muri Volleyball na Basketball.

KANDA HANO UREBE ANDI MAFOTO MENSHI

Amakipe yombi mbere yo gutangira umukino yafashe ifoto ihuriwemo, yiyereka abafana
Minisitiri w'Ingabo, Juvenal Marizamunda, asuhuza abakinnyi mbere y'umukino
Minisitiri wa Siporo, Munyangaju Aurore Mimosa, asuhuza amakipe yombi mbere y'umukino
Umujyanama wa Perezida wa Repubulika mu by'Umutekano, Gen James Kabarebe, yagaragazaga akanyamuneza mu gihe yatangizaga uyu mukino
Abakinnyi 11 babanjemo ku ruhande rwa Republican Guard
Abakinnyi 11 babanje mu kibuga ku ruhande rwa Task Force Division
Abakinnyi ba Republican Guard bishimira igitego rukumbi batsinze Task Force Division
Imikino ya gisirikare ikunda kurangwa n'ishyaka ryinshi
Umunyezamu wa Task Force Division agerageza gukiza izamu rye
Umunyezamu wa Task Force Division yitwaye neza muri uyu mukino
Republican Guard yashyikirijwe igikombe cyayo na Minisitiri w'Ingabo, Juvenal Marizamunda
Task Force Division yabaye iya kabiri mu mupira w'amaguru
Minisitiri wa Siporo, Munyangaju Aurore, yambika imidali BMTC Nasho yabaye iya gatatu mu mupira w'amaguru
Ishuri rya Gisirikare riherereye i Gako ryegukanye igikombe muri Volleyball
Ibikombe byahawe amakipe ya gisirikare yitwaye neza mu Irushanwa ryo #Kwibohora29
Aba-GP bishimira igikombe begukanye mu mupira w'amaguru
Abafana ba Republican Guard bari bishimye cyane nyuma yo kwegukana igikombe
Umuhungu wa Perezida Kagame, Lieutenant Ian Kagame ari mu barebye umukino wa nyuma w'Irushanwa ryo Kwibohora mu mupira w'amaguru
Abafana ba Republican Guard bari bishimye cyane
Abaturage benshi bari bashyigikiye Ikipe ya Republican Guard
Abafana ba Republican Guard ntibatinyaga no kuryama hasi mu gihe bafanaga ikipe yabo
Nk'ibisanzwe 'Morale' iba iri hejuru mu bikorwa bya gisirikare. Uwegukanye intsinzi ayishimira ashishikaye
Rwarutabura usanzwe ari umukunzi ukomeye Rayon Sports, uyu munsi yari inyuma y'Aba-GP

Amafoto: Kwizera Hervé

Video: Irakoze Excellent


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .