Portugal yatwaye igikombe giheruka gukinirwa mu 2016, yihariye umupira mu minota myinshi y’uyu mukino ariko inanirwa kubyaza umusaruro amahirwe yabonye arimo umupira w’umuterekano watewe na Cristiano Ronaldo mu gice cya mbere, ukurwamo n’umunyezamu Thibaut Courtois.

Habura iminota itatu ngo igice cya mbere kirangire ni bwo u Bubiligi bwabonye igitego cyinjijwe na Thorgan Hazard ku ishoti rikomeye yatereye inyuma y’urubuga rw’amahina ubwo yari aherejwe umupira na Thomas Meunier.

Mu gice cya kabiri, Portugal yakoze impinduka, ishyiramo abarimo Bruno Fernandes na João Félix. Byayifashije gukomeza gusatira, Diogo Jota atera umupira wagiye hejuru y’izamu, Rúben Dias atera uwakuwemo na Courtois mbere y’uko Raphaël Guerreiro abona uburyo bwasubijwe inyuma n’igiti cy’izamu.

U Bubiligi bwavunikishije Kevin De Bruyne na Eden Hazard bombi bagasimburwa, bwatsinze uyu mukino ku gitego 1-0 ndetse buzahura n’u Butaliyani mu mukino wa ¼ uteganyijwe ku wa Gatanu.

Mu wundi mukino wa 1/8 wabaye kuri iki Cyumweru, Repubulika ya Tchèque yasezereye u Buholandi bw’abakinnyi 10 mu kibuga ku bitego 2-0.

Matthijs de Ligt yahawe ikarita itukura ku munota wa 55 nyuma yo gukora umupira n’ukuboko akabuza Patrick Shick uburyo bugaragara bwo gutsinda.

Nyuma y’iminota 13, Tomas Holes yatsinze igitego cya mbere cya Repubulika ya Tchèque mu gihe ku munota wa 80, yatanze umupira wavuyemo igitego cyashimangiye intsinzi, cyinjijwe na Schick.

Gutsinda uyu mukino bivuze ko muri ¼, Repubulika ya Tchèque izahura na Denmark mu mukino uzaba ku wa Gatandatu, tariki ya 3 Nyakanga 2021.

EURO 2020 izakomeza ku wa Mbere, tariki ya 28 Kamena, hakinwa indi mikino ibiri ya 1/8, aho saa Kumi n’ebyiri z’umugoroba hazaba uhuza Croatia na Espagne mu gihe u Bufaransa buzisobanura n’u Busuwisi guhera saa Tatu z’ijoro.

Cristiano Ronaldo yitegura gutera umupira uteretse wakuwemo n'umunyezamu Thibaut Courtois

Eden Hazard ashoreye umupira mu kibuga

Thorgan Hazard yatsindiye u Bubiligi igitego ku ishoti yatereye inyuma y'urubuga rw'amahina

Thorgan Hazard yishimira igitego cyafashije igihugu cye gukomeza muri 1/4

Bruno Fernandes ari mu bakinnyi basimbuye mu gice cya kabiri. Aha ari kumwe na Lomelu Rukaku

Pepe yahawe ikarita y'umuhondo ubwo yari akiniye nabi Thorgan Hazard

Courtois arokora u Bubiligi ku mupira wakozweho na Andre Silva

Rúben Dias atera umupira n'umutwe mbere y'uko usubizwa inyuma na Thibaut Courtois

Kevin de Bryune ntiyasoje umukino kubera imvune

Cristiano Ronaldo na bagenzi be basezerewe mu gihe ari bo batwaye igikombe giheruka gukinirwa

Romelu Lukaku ahumuriza Cristiano Ronaldo nyuma y'umukino

Byari ibyishimo ku Munya-Espagne Roberto Martínez utoza u Bubiligi

U Bubiligi buzahura n'u Butaliyani mu mukino wa 1/4 uzaba ku wa Gatanu, tariki ya 2 Nyakanga