Uyu mukino wa kabiri wa ½ cya EURO 2020, wahuje u Bwongereza bwari butarinjizwa igitego mu irushanwa na Danemark yashyigikiwe na benshi nyuma y’uko umwe mu bakinnyi bayo, Christian Eriksen, agiriye ikibazo cy’umutima mu mukino wa mbere ndetse ntiyongere gukina.

Mbere y’uko umukino utangira, Kapiteni w’u Bwongereza, Harry Kane, yahaye mugenzi we wa Danemark, Simon Kjaer, umupira wasinyweho n’abakinnyi bose ba Three Lions, wanditseho Eriksen na nimero 10 mu mugongo.

Imbere y’abafana ibihumbi 60, Danemark yayoboye umukino kuva ku munota wa 30 ubwo Mikkel Damsgaard yatsindaga igitego ku mupira w’umuterekano.

Byasabye u Bwongereza gutegereza umunota wa 38, bubona igitego cyo kwishyura cyitsinzwe na Simon Kjaer ku mupira wahinduwe na Bukayo Saka mu rubuga rw’amahina.

Mu gice cya kabiri, amakipe yombi yabonye uburyo butandukanye burimo ishoti rikomeye ryatewe na Damsgaard, umunyezamu Jordan Pickford ashyira umupira muri koruneri mu gihe Kasper Schmeichel yakuyemo umupira watewe na Harry Maguire n’umutwe n’undi watewe na Harry Kane.

Kunganya igitego 1-1 mu minota 90 isanzwe y’umukino ni byo byatumye hongerwaho indi 30 y’inyongera kugira ngo haboneke ikipe izahura n’u Butaliyani, bwo bwasezereye Espagne mu wundi mukino wa ½ wabaye ku wa Kabiri.

Habura iminota itatu ngo agace ka mbere ka 15 karangire, u Bwongereza bwabonye penaliti ku ikosa ryakorewe kuri Raheem Sterling mu rubuga rw’amahina. Harry Kane yayiteye ikurwamo n’umunyezamu Kasper Schmeichel, ku bw’amahirwe umupira uhura n’uyu Kapiteni w’u Bwongereza awuboneza mu izamu.

Abongereza bashoboraga kubona igitego cya gatatu mu minota ya nyuma y’umukino, uburyo bwabonywe na Sterling busubizwa inyuma n’umunyezamu wa Danemark, washyize umupira muri koruneri.

Gutsinda uyu mukino bivuze ko u Bwongereza buzahura n’u Butaliyani ku mukino wa nyuma wa EURO 2020 uzabera kuri Stade Wembley ku Cyumweru, tariki ya 11 Nyakanga 2021, saa Tatu z’ijoro.

U Bwongereza bwageze ku mukino wa nyuma w’Igikombe cy’u Burayi ku nshuro ya mbere mu mateka yabwo, bwaherukaga ku mukino wa nyuma w’irushanwa rikomeye mu 1966 ubwo bwegukanaga Igikombe cy’Isi.

Danemark yafunguye amazamu ku gitego cyatsinzwe na Mikkel Damsgaard ku mupira w'umuterekano

Mikkel Damsgaard yishimira igitego cya mbere cyinjiye mu izamu ry'u Bwongereza mu irushanwa ry'uyu mwaka

Abakinnyi b'u Bwongereza bishimira igitego cyo kwishyura ubwo Simon Kjaer yari amaze kwitsinda ku mupira wahinduwe na Bukayo Saka

Umunyezamu Kasper Schmeichel akuramo umupira w'umutwe watewe na Harry Maguire

Harry Kane yabonye uburyo yateye busubizwa inyuma na Kasper Schmeichel

Mu gace ka mbere k'iminota 30 y'inyongera, u Bwongereza bwahawe penaliti ku ikosa ryakorewe kuri Raheem Sterling

Harry Kane yatsinze igitego cya kabiri cy'u Bwongereza nyuma y'uko Kasper Schmeichel yari amaze gukuramo penaliti

Kane na Phil Foden bishimira igitego cy'intsinzi

Byari ibyishimo ku mutoza Gareth Southgate nyuma yo gufasha u Bwongereza gutsinda uyu mukino

Abafana basaga ibihumbi 60 barimo ibihumbi 8000 ba Danemark ni bo barebye uyu mukino

U Bwongereza buzahura n'u Butaliyani ku mukino wa nyuma wa EURO 2020 uzaba ku Cyumweru saa Tatu z'ijoro