00:00:00 IGIHE NETWORK KN KINYARWANDA EN ENGLISH FR FRANCAIS

Umunyezamu wa Misiri yari afite icupa ry’amazi ririho amazina y’abakinnyi ba Sénégal n’aho batera penaliti

Yanditswe na Bukuru JC
Kuya 7 February 2022 saa 04:10
Yasuwe :

Umunyezamu w’Ikipe y’Igihugu ya Misiri, Mohamed Abou Gabal ‘Gabaski’, wari ufite icupa ry’amazi rizengurukijwe n’agapapuro kariho amazina y’abakinnyi ba Sénégal n’aho batera penaliti, akomeje kugarukwaho na benshi.

Gabaski yaraye akuyemo penaliti ya Sadio Mané mu minota isanzwe y’umukino wa nyuma w’Igikombe cya Afurika cyaberaga muri Cameroun, yakuyemo kandi n’iya Bouna Sarr muri penaliti zarangiye igihugu cye gitsinzwe 4-2.

Uyu munyezamu yarebaga ku icupa ry’amazi mbere ya buri penaliti kandi akajya mu ruhande rwa nyarwo umupira wagiyemo nubwo yakuyemo penaliti imwe gusa muri eshanu yatewe.

Ifoto y’iri cupa ry’amazi yagiye ahagaragara, igaragaza ko aho penaliti ebyiri za Sadio Mané zagiye ari ho umunyezamu yari azi ko ari buzitere.

Gabaski w’imyaka 33 ntiyakoresheje gusa iri cupa ku mukino wa nyuma kuko yanafashijwe na Kapiteni we, Mohamed Salah, wamwongoreye mbere y’uko Sadio Mané bakinana muri Liverpool ahusha penaliti mu gice cya mbere.

Penaliti yahawe Sénégal ku munota wa gatandatu ubwo Mohamed Abdelmonem yari amaze kugusha Saliou Ciss mu rubuga rw’amahina.

Gabaski yagiye iburyo nyuma yo kumva inama yagiriwe na Salah ndetse abasha kuhahurira n’umupira wa Mané, awukuramo.

Amakipe yombi yakomeje kunganya ubusa ku busa mu minota 120, byatumye hashyirwaho penaliti, ubundi Gabaski atangira gukoresha neza ibyari ku icupa rye ry’amazi.

Uyu munyezamu yagiye mu ruhande rwa nyarwo kuri penaliti yinjijwe na Kalidou Koylibaly ndetse akora ku mupira. Ni ko byagenzi kandi no kuri penaliti yatewe na Abdou Diallo nubwo ntacyo yayikozeho.

Umukinnyi umwe wateye uruhande rutandukanye n’urwo Gabaski yagiyemo ni Bamba Dieng.

Icupa ry'amazi ry'umunyezamu wa Misiri, Gabaski, rikomeje kuvugisha benshi
Mohamed Salah yongoreye Gabaski mbere y'uko Sadio Mané atera penaliti mu gice cya mbere
Sadio Mane yahushije penaliti yagiye mu ruhande rumwe n'umunyezamu Gabaski akuramo umupira
Gabaski akuramo penaliti yatewe na Bouna Sarr
Gabaski yarebaga ku icupa ry'amazi mbere ya buri penaliti ya Sénégal
Gabaski ntiyabashije gukuramo penaliti ya nyuma yatewe na Sadio Mané

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .