00:00:00 IGIHE NETWORK KN KINYARWANDA EN ENGLISH FR FRANCAIS

Imwe mu mibare y’ingenzi yaranze CAN 2021

Yanditswe na Blaise Mukwende Nziza
Kuya 11 February 2022 saa 02:34
Yasuwe :

Kuva tariki ya 9 Mutarama kugeza ku ya 6 Gashyantare 2022, muri Cameroun habereye Igikombe cya Afurika cyahuje ibihugu 24.

Iri rushanwa ryabaga ku nshuro ya 33, ryari rigizwe n’imikino 52.

Sénégal yegukanye Igikombe nyuma yo gutsinda Misiri penaliti 4-2 ubwo ibihugu byombi byari byanganyije ubusa ku busa mu minota 120 yakinwe ku mukino wa nyuma.

Imwe mu mibare yaranze iri rushanwa:

0: Guinée Bissau na Mauritania ntibyashoboye gutsinda igitego na kimwe muri iri rushanwa. Byombi byakinnye imikino itatu ariko ntibyabashije kurenga imikino y’amatsinda.

1: Ikipe y’igihugu ya Sénégal yashoboye kwegukana Igikombe cya Afurika bwa mbere mu nshuro 16 yacyitabiriye. Intare z’i Teranga zageze kuri uyu muhigo nyuma yo kugera ku mukino wa nyuma bwa gatatu (2002, 2019 na 2021).

2: Sénégal na Misiri ni yo makipe yugariye neza kurusha andi. Ibitego bibiri byonyine ni byo byinjijwe mu mazamu yayo. Aya makipe yari yibitseho abanyezamu ari bo; Edouard Mendy wegukanye igihembo cy’umunyezamu mwiza na Mohamed Gabaski Abou Gabal wo ku ruhande rwa Misiri.

Kwitsinda igitego muri iri rushanwa byabaye inshuro ebyiri ku makipe abiri; Burkina Faso na Cameroun.

3: Abakinnyi batanze imipira myinshi (itatu) yavuyemo ibitego ni Collins Fai na Martin Hongla bakinira Cameroun na Issa Kaboré ukinira Burkina Faso.

8: Rutahizamu akaba na Kapiteni wa Cameroun, Vincent Aboubakar, yanyeganyeje inshundura inshuro umunani.

Yabuzeho igitego kimwe kugira ngo yese umuhigo wa Ndaye Mulamba watsindiye Repubulika iharanira Demokarasi ya Congo ibitego icyenda mu Gikombe cya Afurika mu 1974.

Uyu mubare umunani uhagarariye kandi abantu bapfiriye kuri Sitade ya Olembé bazize umubyigano wo kwinjira ku mukino wa Cameroun n’Ibirwa bya Comores.

14: Hatanzwe amakarita 14 y’umutuku harimo n’iyahawe umutoza wa Misiri, Carlos Queiroz, ku mukino wa ½ wabahuje na Cameroun.

100: Ibitego 100 byatsinzwe mu mikino 52 y’iri rushanwa. Impunzandengo y’ibitego byabonetse ku mukino ni 1,92.

198: Ni yo makarita y’umuhondo yatanzwe mu Gikombe cya Afurika cyabereye muri Cameroun, angana n’impunzandego y’amakarita 3,8 ku mukino.

Abakinnyi ba Sénégal bishimira Igikombe cya Afurika batwariye muri Cameroun
Kapiteni wa Cameroun, Vincent Aboubakar, yatsinze ibitego umunani muri CAN 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .