00:00:00 IGIHE NETWORK KN KINYARWANDA EN ENGLISH FR FRANCAIS

CAN 2021: Cameroun yegukanye umwanya wa gatatu nyuma yo kubanzwa ibitego bitatu

Yanditswe na Bukuru JC
Kuya 6 February 2022 saa 08:15
Yasuwe :

Ikipe y’Igihugu ya Cameroun yegukanye umwanya wa gatatu mu Gikombe cya Afurika nyuma yo gutsinda Burkina Faso penaliti 5-3 ubwo ibihugu byombi byari byanganyije ibitego 3-3 mu mikino minota isanzwe y’umukino.

Kapiteni wa Cameroun, Vincent Aboubakar yafashije igihugu cye kwishyura ibitego 3-0 cyari cyatsinzwe mu minota 49 ya mbere.

Muri uyu mukino ubanziriza uwa nyuma wabereye kuri Stade Ahmadou Ahidjo ku wa Gatandatu, Burkina Faso yasoje igice cya mbere iyoboye n’ibitego bibiri byatsinzwe na Steeve Yago wafunguye amazamu ku munota wa 24 n’igitego cya kabiri cyitsinzwe n’umunyezamu André Onana ku munota wa 43.

Nyuma y’iminota ine igice cya kabiri gitangiye, Djibril Ouattara yatsinze igitego cya gatatu n’umutwe ku mupira mwiza yari ahawe na Bertrand Traoré.

Cameroun yakiniraga imbere y’abafana bayo batari bake, yakomeje gusatira ishaka kwishyura ariko byayisabye gutegereza umunota wa 71 ku gitego cyatsinzwe na Stephane Bahoken.

Iki gitego cyayihaye izindi mbaraga n’umuhate wo gusatira izamu birushijeho ndetse byatanze umusaruro ku munota 85 ubwo Vincent Aboubakar yatsindaga icya kabiri ku mupira wahinduwe na Nicholas Ngamaleu.

Nyuma y’iminota ibiri, umunyezamu wa Burkina Faso, Farid Ouedraogo, yasohotse nabi agongana n’umukinnyi we, Soumaïla Ouattara, byatumye umupira atawufata ahubwo ugwa imbere ya Vincent Aboubakar watsinze igitego cya gatatu.

Iminota 90 yarangiye ari ibitego 3-3 hitabazwa penaliti zahiriye cyane Cameroun kuko yinjije eshanu zose mu gihe Burkina Faso yahushije imwe ya Blati Touré, birangira ari 5-3.

Vincent Aboubakar watsinze ibitego umunani mu irushanwa ry’uyu mwaka, yinjiye ku rutonde rw’abakinnyi batatu batsinze ibitego byinshi mu irushanwa rimwe ry’Igikombe cya Afurika, aho uwatsinze byinshi mu mateka ari Umunya-Zaire Ndaye Mulamba watsinze ibitego icyenda muri CAN 1974 na Laurent Poku wo muri Côte d’Ivoire watsinze ibitego umunani muri 1970.

CAN 2021 irasozwa kuri iki Cyumweru aho hakinwa umukino wa nyuma uhuza Misiri na Sénégal guhera saa Tatu z’ijoro.

Djibril Ouattara yishimira igitego cya gatatu cya Burkina Faso mu minota ya mbere y'igice cya kabiri
Umunyezamu Farid Ouedraogo yagonganye na mugenzi we Soumaïla Ouattara mbere y'uko Aboubakar atsinda igitego cya gatatu
Farid Ouedraogo yasimbuwe amaze gutsindwa igitego cya gatatu nyuma yo kugaragaza ko yababaye ubwo yagonganaga na mugenzi we
André Onana akuramo penaliti ya Blati Touré
Samuel Eto'o Fils uyobora Ishyirahamwe rya ruhago muri Cameroun ashimira Kapiteni w'iki gihugu, Vincent Aboubakar
Dr Parice Motsepe uyobora CAF na Gianni Infatino uyobora FIFA bari mu bahembye Cameroun imidali y'umwanya wa gatatu
Abakinnyi ba Cameroun bishimira umwanya wa gatatu babonye mu irushanwa bakiriye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .