00:00:00 IGIHE NETWORK KN KINYARWANDA EN ENGLISH FR FRANCAIS

Uko Magic Johnson yijunditswe kubera virusi itera SIDA ariko agakina umukino wa NBA All Star

Yanditswe na Blaise Mukwende Nziza
Kuya 26 January 2022 saa 02:02
Yasuwe :

Mbere y’uko Shampiyona ya Basketball muri Amerika (NBA) yo mu 1991/92 itangira, Magic Johnson yamenye ko afite ubwandu bw’agakoko ka virusi itera SIDA asezera kuri uyu mukino.

Mu kiganiro yagiranye n’abanyamakuru mu minsi yakurikiye. ku wa 7 Ugushyingo 1991, Johnson yatangaje ko atakwemeza neza aho yayikuye kuko umugore we bari bashakanye uwo mwaka n’umwana we bari bazima.

Umwaka ukurikiyeho, muri Gashyantare, ntibyabujije abafana kumuha amajwi yo kugira ngo azitabira umukino uhuza intoranywa uzwi nka “NBA All Star Game” wabereye mu Mujyi wa Orlando, muri Leta ya Florida.

Gusa, mbere y’uko uwo mukino uba, habaye impaka z’urudaca hagati y’abakinnyi bamwe na bamwe, bavuga ko Johnson yakwanduza bagenzi be ubwandu mu gihe yakina uwo mukino.

Karl Malone wari ukiri umukinnyi muto wa Utah Jazz yahanganaga bikomeye na Los Angeles Lakers ya Johnson mu gice cy’Uburengerazuba mu mpera y’imyaka ya 1980, yavuzwe cyane kurusha abandi mu batari bashyigikiye gukina kwa Johnson muri uwo mukino.

Urwitwazo rwe rwari uko yari afite impungenge z’uko mu gihe Johnson agiriye igisebe ku kibuga, abagikiniramo hamwe na we bahandurira.

Byron Scott wari warakinannye na Johnson imyaka umunani akaba inshuti ye ya hafi cyane, yatangaga igitekerezo cy’uko nta mpamvu yagombaga gutuma Johnson akina uwo mukino kubera ko yagombaga kurinda ubuzima bwe.

A.C Green bari baratwaranye ibikombe bibiri byikurikiranya bya shampiyona (1987 no mu 1988) ntiyashyigikiraga gukina kwa Johnson kuko amategeko yemereraga abakina uwo mukino kuba batarasezeye kandi ku rundi ruhande, uyu mukinnyi yari amaze amezi atatu asezeye.

Atitaye ku mbogamizi n’ingorane zitambikaga, Johnson wari warahawe akabyiniriro ka ‘Magic’ kakamufata kugeza aho kabaye izina rye bwite, yabashije gutsinda amanota menshi kurusha abandi muri uwo mukino, 25, anatoranywa nk’umukinnyi w’umukino wahize abandi.

Gary Washburn wakoreraga ikinyamakuru The Boston Globe, nyuma y’umukino yagize ati “Wari umukino we wa nyuma, wazanye amarangamutima mu mwuga w’imikino….”

Ibura ry’amakuru ahagije ku cyorezo cya SIDA muri sosiyete mu myaka y’impera ya 1980 n’intangiriro y’imyaka ya za 1990, ryateye urujijo ku cyagombaga gukorwa ndetse uhereye no kuri Magic Johnson yicujije kuba yarasezeye ku mukino nyuma yo gutahura ko afite ubwandu nk’uko Yahoo Sports yabitangaje muri 2011, hashize imyaka 20 abana n’ubwandu.

Magic Johnson yakiniye ikipe ya Los Angeles Lakers ayifasha gutwara ibikombe bitanu bya NBA (1980, 1982, 1985, 1987 na 1988), anegukana ibihembo bitatu by’umukinnyi wahize abandi mu irushanwa (1980, 1982 na 1987).

Byarangiye Magic Johnson akinnye uyu mukino nubwo byari byabanje gukurura impaka kuko arwaye Sida

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .