Uyu mukino wa mbere wabaye ku rukerera rwo ku wa Gatatu, tariki 22 Gicurasi ku kibuga cya Celtics TD Garden.

Nk’ikipe yari imbere y’abafana bayo, Celtics yatangiranye umukino imbaraga abakinnyi bayo nka Jayson Tatum na Jrue Holiday bayitsindira amanota menshi.

Ku rundi ruhande, Tyrese Haliburton na Pascal Siakam bafashaga Pacers kugabanya ikinyuranyo bigatuma umukino wegerana cyane. Igice cya mbere cyarangiye amakipe yombi anganya amanota 64-64.

Umukino wakomeje kwegerana cyane ari na ko uryoha cyane kuko nta kipe yasigaga indi amanota arenze atatu. Mu gace ka nyuma k’umukino, Jaylen Brown na Derrick White bakoreye mu ngata bagenzi babo.

Habura amasegonda atanu ngo umukino urangire, Jaylen Brown yatsindiye Celtics amanota atatu, yatumye umukino urangira amakipe yombi anganya 117-117 bityo haryirwaho iminota itanu y’inyongera (overtime).

Muri iyi minota, Tatum yari ameze neza cyane kuko yatsinzemo amanota 10 muri 16 Celtics yatsinzemo bityo umukino urangira yatsinze Indiana Pacers amanota 133-128.

Umukino wa kabiri uteganyijwe mu rukerera rwo ku wa Gatanu, tariki 24 Gicurasi 2024.

Mu gice cy’iburengerazuba baratangira imikino ya nyuma, mu rukerera rwo ku wa Kane, tariki 23 Gicurasi 2024 aho Minnesota Timberwolves irakira Dallas Mavericks.

Jayson Tatum atsinda amanota atatu

Indiana Pacers yatangiye nabi imikino ya nyuma

Abakinnyi ba Celtics bishimira intsinzi

Tyrese Haliburton ahanganye na Jaylen Brown

Amanota atatu Jaylen Brown yatsinze mu masegonda ya nyuma, agafasha Celtics gusoza iminota isanzwe y'umukino inganya na Pacers amanota 117-117