REG BBC izakina iri rushanwa ku nshuro yayo ya mbere. Si ubwa mbere izaba ikina amarushanwa mpuzamahanga ahuza amakipe yabaye aya mbere iwayo.

Mu mwaka w’imikino 2018-2019, REG BBC yaserukiye u Rwanda mu mikino ihuza amakipe yabaye aya mbere iwayo. Irushanwa ryabereye mu Misiri.

Icyo gihe, REG yasohotse kuko yari yatwaye shampiyona y’u Rwanda ya 2017-2018. Mu mikino Nyafurika yasezerewe mu matsinda.

REG iri mu makipe azakina imikino ya BAL atamaze igihe ashinzwe kuko yabayeho kuva mu 2016 ubwo yemerwaga nk’umunyamuryango wa FERWABA.

Iyi kipe itozwa na Robert Pack, kapiteni wayo Kaje Elie yanabaye muri mucyeba wa REG, Patriots Basketball Club yakinnye BAL bwa mbere nk’ikipe yo mu Rwanda.

REG yaboneye itike muri Sahara Conference i Dakar, ifite ibikombe bibiri bya shampiyona birimo icyo yatwaye mu mwaka w’imikino 2017-2018 na 2020-2021.

Gutwara igikombe cya shampiyona ya 2021, byatumye REG ibona itike yo gukina amajonjora yo gushaka itike y’imikino ya nyuma ya BAL ya 2022.

Mu bigwi ifite mu myaka itandatu imaze ishinzwe, REG BBC yatwaye ibikombe bitatu by’irushanwa ry’Ubutwari (2018, 2019, 2020).

REG kandi yatwaye irushanwa ryo kwibuka rya 2018 itsinze APR BBC amanota 84-45 ku mukino wa nyuma na 2019 itsinze Patriots BBC amanota 74-71.

Umutoza wa REG BBC, Robert John Pack Jr w’imyaka 53 yabayeho umukinnyi wa Basketball akinira amakipe arimo; Portland Blazers, Washington Bullets, Dallas Mavericks.

Yakiniye kandi Denver Nuggets, Minnesota Timberwolves na New Jersey Nets. Akazi ko gukina yagatangiye mu 1991 kugeza mu 2005.

Mu mwuga wo gutoza, yatoje amakipe atandukanye ari umutoza wungirije. Yabaye muri New Orleans Hornets, Los Angeles Clippers na Oklahoma City Thunder.

Robert yageze muri REG BBC mu 2022 avuye muri Washington Wizards nayo yari abereye umutoza wungirije.

REG BBC izatangira imikino ya BAL ya 2022 ikina na FAP yo muri Cameroun kuri uyu wa Gatandatu tariki 21 Gicurasi 2022 saa kumi n’ebyiri.

Amakipe yombi azaba akina umukino wa ¼ cy’irangiza hashakwa itike ya ½ cy’irangiza.

REG igiye gukina BAL ku nshuro ya mbere ikaba ikipe ya kabiri yo mu Rwanda nyuma ya Patriots BBC

Kapiteni wa REG BBC, Kaje Elie avuga ko nl'abakinnyi badashaka kuzibukwa nk'abakiriye irushanwa ahubwo bashaka kuzibukwa nk'abatwaye igikombe

Nshobozwabyosenumukiza Jean Jacques Wilson umukinnyi wagize uruhare rukomeye mu gushaka itike ya BAL ya 2022 i Dakar