00:00:00 IGIHE NETWORK KN KINYARWANDA EN ENGLISH FR FRANCAIS

Henry Mwinuka yongereye amasezerano muri REG BBC

Yanditswe na Ntare Julius
Kuya 4 Ugushyingo 2022 saa 02:44
Yasuwe :

Umutoza mukuru wa REG BBC, Henry Mwinuka, yahawe amasezerano mashya y’imyaka ibiri azageza mu 2024.

Uyu mugabo w’Umunya-Tanzania atoza REG BBC kuva mu Ugushyingo 2019, aho yari yabanje guhabwa amasezerano y’imyaka ibiri.

Amakuru agera kuri IGIHE yemeza uko nyuma yo gusoza andi masezerano y’umwaka umwe yari yasinye mu 2021, kuri ubu Mwinuka yahawe andi mashya azageza mu 2024.

Kongererwa amasezerano k’uyu mutoza kwabayeho nyuma y’uko afashije REG BBC kwegukana Igikombe cya Shampiyona ya Basketball ku nshuro ya kabiri yikurikiranya aho yahigitse mukeba, Partiots BBC.

Gutwara Shampiyona bivuze iyi kipe ya Sosiyete y’Igihugu ishinzwe Ingufu izongera guhagararira u Rwanda mu irushanwa Nyafurika rya Basketball Africa League (BAL 2023).

Muri Nzeri, Mwinuka yavuze ko atazemera kongera kungiriza ubwo REG BBC izaba ikina BAL. Ni nyuma y’uko muri uyu mwaka, yazaniweho umutoza mukuru, Umunyamerika Robert Pack ariko ntibarenge ¼ cya BAL 2022.

Yagize ati “Reka mvugishe ukuri, ibintu nibyongera kugenda nk’umwaka ushize nkagirwa umutoza wungirije, nzegura.”

Henry Mwinuka yageze mu Rwanda muri 2015, agirwa umutoza wa Patriots BBC asimbuye Kalima Cyrille wari umaze kwegura.

Mu myaka ine yayitoje kugeza mu Ugushyingo 2019, Mwinuka yahesheje Patriots BBC ibikombe bitatu bya Shampiyona, irushanwa ryo Kwibuka n’irushanwa ry’Intwari. Yayihesheje kandi igikombe gitegura Shampiyona na bibiri bya Play-offs.

Nyuma yo gufasha Patriots BBC gutwara Shampiyona ku nshuro ya gatatu mu 2019, yayigejeje mu ijonjora rya kabiri ryo gushaka itike y’imikino ya Basketball Africa League (BAL 2020), aho yatsinze imikino ine yakiniye muri Tanzania.

Mu Ugushyingo 2019, ni bwo Henry Mwinuka yagizwe umutoza mukuru wa REG BBC.

Asanzwe kandi ari Umutoza wungirije mu Ikipe y’Igihugu ya Basketball kuva muri Nzeri 2020.

Mbere yo kuza mu Rwanda, yabaye umutoza wa University of Dar es Salaam Basketball Club hagati ya 2003 na 2006 na Savio Basketball Club hagati ya 2007 na 2008.

Yabaye kandi umutoza wungirije mu ikipe y’igihugu ya Tanzania hagati ya 2009 na 2010 ndetse n’Umutoza wa Kampala International University hagati ya 2011 na 2015.

Henry Mwinuka yongereye amasezerano muri REG BBC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .