00:00:00 IGIHE NETWORK KN KINYARWANDA EN ENGLISH FR FRANCAIS

Abana b’abanyempano muri Basketball bagiye kwitabwaho

Yanditswe na Mihigo Saddam
Kuya 26 May 2022 saa 05:18
Yasuwe :

Ishyirahamwe ry’umukino wa Basketball mu Rwanda (FERWABA) ryasinyanye amasezerano y’ubufatanye na NBA Africa, azibanda mu kuzamura abana b’Abanyarwanda bafite impano muri Basketball.

Aya masezerano yasinywe kuri uyu wa Kane tariki 26 Gicurasi 2022, azamara imyaka ibiri ishobora kongerwa nk’uko Perezida wa FERWABA, Mugwiza Désire abihamya, akaba ari nawe washyize umukono ku masezerano ku ruhande rw’u Rwanda, naho ku ruhande rwa Umuyobozi wa NBA Africa, Victor Williams.

Umunyabanga uhoraho muri Minisiteri ya Siporo, Shema Maboko Didier yari muri uyu muhango nk’intumwa ya Minisitiri, Aurore Mimosa Munyangaju.

Mugwiza avuga ko aya masezerano azarushaho gufasha abana b’Abanyarwanda kuzamura impano mu mukino wa Basketball, bikanagira ingaruka nziza ku ikipe y’igihugu.

Yagize ati “Bizadufasha kugira amahugurwa menshi ajyanye n’imyitozo ihabwa abana bakeneye kuzamura impano zabo mu buryo burambye.”

Mugwiza akomeza avuga ko NBA Africa yatangiye gufasha Basketball y’u Rwanda mu 2017 hatangwa amahugurwa y’abatoza ariko biza guhagarikwa na COVID-19.

Ati” Ntabwo NBA Africa ari nshya mu Rwanda. Mu myaka ibiri ishize ntabwo twagize ibikorwa byo kuzamura impano z’abana kubera COVID-19 ariko habaye Shampiyona y’Amashuri n’abatoza barahugurwa.”

Umuyobozi wa NBA Africa, Victor Williams avuga ko ikibaraje ishinga ari ukuzamura urwego rw’abana bakina Basketball no kurushaho kuyibegereza.

Yagize ati “NBA Africa irajwe ishinga no kwegera abana bakiri bato bakazamurirwa impano hirya no hino muri Afurika. Ibi biri muri gahunda yo kuba Basketball ifite aho iva n’aho igana ndetse no gutuma umukino ugera kuri bose.”

Victor avuga ko kandi bemeye gusinya amasezerano na FERWABA na MINISPORTS kugira ngo bafatanye gukuza Basketball y’u Rwanda.

Umunyabanga uhoraho muri Minisiteri ya Siporo, Shema Maboko Didier wari intumwa ya Minisitiri, yavuze ko mu gihe umukino wegerejwe abana bigira umusaruro mwiza ku ikipe y’igihugu.

Ati “Bigendanye no kuba iyi gahunda ahanini ireba abana bari mu mashuri bakagaragaza impano bafite muri Basketball, bizafasha u Rwanda kuzaba rufite abakinnyi bahagije bitabazwa mu ikipe y’igihugu mu myaka iri imbere.”

Mu mwaka w’imikino 2017-2018 nibwo NBA Africa yatangiye gahunda zayo mu Rwanda hahugurwa abatoza batoza abana mbere y’uko mu 2019 hatangijwe shampiyona y’amashuri.

Shampiyona y’abatoza, abahungu n’abakobwa (Jr.NBA) yarebaga abana bari mu bigo by’amashuri 60 byatoranyijwe birimo 30 by’ingimbi na 30 by’abangavu.

Basketball y'u Rwanda yiteze kungukira mu mikoranire yayo na NBA Africa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .