00:00:00 IGIHE NETWORK KN KINYARWANDA EN ENGLISH FR FRANCAIS

Dallas Mavericks irakomanga ku mukino wa nyuma wa NBA

Yanditswe na Byiringiro Osée Elvis
Kuya 27 May 2024 saa 09:45
Yasuwe :

Dallas Mavericks ikomeje gusatira umukino wa nyuma muri Shampiyona ya Basketball muri Leta Zunze Ubumwe za Amerika (NBA), nyuma yo kugira intsinzi eshatu mu yo iri guhuramo na Minnesota Timberwolves.

Iyi kipe iri gukina imikino ya nyuma mu gice cy’Iburengerazuba, aho ikomeje kwihererana Minnesota Timberwolves cyane ko ubu iyoboye n’intsinzi eshatu ku busa.

Mavericks yabigezeho mu rukerera rwo ku wa Mbere, tariki 27 Gicurasi 2024 ubwo yatsindaga Minnesota Timberwolves amanota 116-107.

Ni umukino utagoranye cyane kuko Mavericks yari imbere y’abafana yawuyoboye kuva utangiye kugeza urangiye. Nk’ibisanzwe, abakinnyi bayo nka Luka Dončić na Kyrie Irving bigaragaje cyane.

Igice cya mbere cyarangiye Dallas Mavericks iyoboye umukino n’amanota 60 kuri 52.
Timberwolves yavuye kuruhuka yiminjiriyemo agafu itangira gutsinda amanota menshi ibifashijwemo na Anthony Edwards na Mike Conley Jr bagabanya ikinyuranyo bityo agace ka gatatu karangira amakipe yombi anganya amanota 87-87.

Mu gace ka nyuma, ubunararibonye bw’abakinnyi bakuru no gusunikwa n’abafana byafashije Dallas Mavericks gusoza umukino yegukanye intsinzi y’amanota 116 ku 107 ya Minnesota Timberwolves.

Iyi kipe yahise igira intsinzi eshatu ku busa, aho ubu isabwa imwe ikerekeza ku mukino wa nyuma wa NBA muri rusange. Umukino wa kane uteganyijwe ku wa Gatatu, tariki 29 Gicurasi 2024.

Mu gice cy’iburasirazuba, iyi mikino iri guhuza Boston Celtics na Indiana Pacers, aho Celtics imaze gutsinda imikino itatu yose bakinnye bityo ikaba isabwa intsinzi imwe gusa ikagera ku mukino wa nyuma.

Umukino wa kane uteganyijwe ku wa Kabiri, tariki 28 Gicurasi 2024 ukazabera ku kibuga cya Indiana Pacers, Gainbridge Fieldhouse.

Birashya bishyira gusezererwa kwa Minnesota Timberwolves
Luka Dončić akomeje gufasha Dallas Mavericks gusatira umukino wa nyuma
Anthony Edwards yagerageje gufasha Timberwolves ariko biranga
Dereck Lively atsinda dunk

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .