Uyu mukino wa kabiri wabaye mu rukerera rwo ku wa Mbere, tariki 10 Kamena 2024 ku kibuga cya Celtics, TD Garden.

Mavericks yatsinzwe umukino wa mbere yinjiranye imbaraga muri uyu mukino, itsinda agace ka mbere ku manota 28-25. Mu ka kabiri, Celtics yinjiye mu mukino, Jrue Holiday atangira gutsinda amanota menshi.

Igice cya mbere cyarangiye Boston Celtics iyoboye umukino n’amanota 54 kuri 51 ya Dallas Mavericks.

Iyi kipe y’i Boston yakomeje gukina neza no kuyobora umukino mu gace ka gatatu, cyane ko abarimo Jayson Tatum na Jayden Brown bayitsindiraga cyane.

Ku rundi ruhande, Luka Dončić na Paul Jamaine Washington bagerageza kugabanya ikinyuranyo ariko Celtics ikabyitwaramo neza.

Umukino warangiye Boston Celtics yatsinze Dallas Mavericks umukino wa kabiri, ku manota 105-98 ikomeza kwizera kuzegukana Igikombe cya Shampiyona.

Imikino ibiri ikurikira izabera ku kibuga cya Mavericks, American Airlines Center aho uwa gatatu uteganyijwe ku wa Kane, tariki 13 Kamena 2024.

Wari umukino w'ishyaka n'imbaraga nyinshi

Jrue Holiday yagize umukino mwiza cyane

Dallas Mavericks imaze gutsindwa imikino ibiri mu ya nyuma ya NBA